Ilisimatusartoq: Tunumiut inuiannit kalaallinit ilaanngitsutut misigisarput

Kitaaniit ajattugaasutut politikkikkullu sunniuteqarsinnaassutsikkut killeqartutut tunimiut misigisimasapput.

Tunumiut kitaamiunit nunasiaataatigineqartutut ilaatigut misigisimasarsarput.

Taama Ulunnguaq markussen ph.d.-nngorniartoq misissuereerluni naliliivoq.

Taanna nammineerluni kitaaninngaanneersuuvoq, Ilisimatusarfimmili ph.d.-nngorniarpoq suliaminullu atatillugu tunumi misissuilluni.

Taassuma tunumiut unammillernartutut ineriartorfiunngitsutullu misisigisimasut qanimut oqaloqatigalugit paasisassarsiorpoq.

- Nunatsinni qanoq sinaakkusersugaanerput qiviaraanni Kalaallit inuiaat inuiaqatigiit ataasiusutut ataasiinnarmik oqaasilittut, taavalu aamma assigiimmik kulturikkut oqaluttuarisaanikkullu tunuliaqutilittut isiginiarneqartarnerat nunatsinni sumiiffiit ilaanni ajornartorsiutinik pilersitsisimasut uani misissuininni paasivara.

Oqaatsit ajornartorsiutaangaatsiartut

Ulunnguaq Markussenip oqarnera naapertorlugu, tunumiut inuiannut kalaallinut ilaasutut misigisimanngillat.

Ileqqui oqaluttuaataat oqaasiilu allaanerupput.

Tasiilami najugalik, Elise Uupi Kuitsep kitaamiut tunumiut ulluinnaanut qanoq initutiginerat nammineerluni nalunngilluinnarpaa.

- Aqquserngit atii tunumiunngorsarneqarnikuugaluarput, kisianni kitaamiusut allannilimmik naanillit, uagut oqaaserinngisagut. Soorlu Napparngummut, silasiorpimmut – uagut oqartarpugut Napparngummu tsilasiorpimmu, taanna oqarpoq.

Tasiilami aqquserngit tunumiutut atsersorneqalermata tunumiutut atseqalernissaat siunertaagaluartoq, uani takuneqarsinnaavoq tunumiut kitaamiullu oqaasii akulerullugit atsiisoqarsimasoq.

Tunumiut inuiannit kalaallinit ilaanngitsutut misigisarsimasut, Ulunnguaq Markussenip oqaatigaa.

- Tassani ilaatigut nunatsinni assigiimmik atugassaqartitsiniarnerigaluaq assigiingisitsinermik pilersitsisimammat, Ulunnguaq Markussen oqarpoq.

Tunumi meeqqat atuarfianni atuartut kitaamiusut danskisullu atuartinneqartarput, tamanna atuarnerannut ilinniaqqinnissaannullu aamma kalluisarpoq.

- Meeqqat atuarfiinnaalluunniit qiviaraanni tunumiut meerartai nammineq oqaatsitik atorlugit inatsisitigut pisinnaatitaaffeqanngillat. Taassuma malitsigisaanik pikkorissusaat kitaamiut meerartaasa uuttuutaanut atorneqartarput.

- Taamaasilluni uani meeqqat atuarfianni inaarutaasumik kisitsisit qiviaraanni takuneqarsinnaasarpoq aamma meeqqat atuarfianni angusarineqartartut appasinnerusut. Taavalu meeqqat atuarfianni angusat inuunerup sinnerani matuersaatitut atorneqartarput, taannaannarluunniit inuunermi periarfissanik assigiinngisitsinermik pilersitsivoq.

Kingulliunneqartuartutut misigisimaneq

Ulunnguaq Markussenip ph.d.-liamini aamma tunumiut politikikkut sunniuteqarnissaminnik periarfissakitarnerat, kissaataallu maluginiarneqannginnerusarnerat malugaa.

Tamanna Tasiilameersup Elise Uupi Kuitse, taperserpaa.

- Kingulliunneqartutut misigisimajuarpugut, ukiorpassuanngortuni sanaartorneqarnikuunngilaq Tasiilami, Tasiilaq alliartunngilaq. Inissarsiortorpassuupput ukiorpassuarni utaqqisartut. Sanaartortoqartaraluaruni suliffissat amerlanerusinnaagaluarput. Taamaalilluni suliffissaaleqisut ikinnerussagaluarput, taanna oqarpoq.

Ulunnguaq Markussenip misissuinermini paasisaat naapertorlugit tunumiut kitaamiunit soqutigineqanngitsutut, politikikkulluunniit akuutinneqarneq ajortutut misigisimasarput.

Ajornartorsiut kommunip iliuuseqarneratigut aaqqinneqarsinnaasoq, taanna isumaqarpoq.

Tunumiut oqaasii akuerineqarpata, atuartitsissutitullu atulerpata kitaamiut tunumiullu naligiinnerusumik naliliiffigineqarsinnaalissasut taanna isumaqarput.