Lars Poulsenip (S) Tunumi immikkut kommuneqalersikkusukkaa
Tunumiut kitaaniit atukkamikkut politikikkullu akuutinneqartanngitsutut misigisimasartut, ilisimatusaatigalugu ph.d.-nngorniartup, Ulunnguaq Markussenip saqqummiuppaa.
Taamaammat Tunu immikkut kommuninngornissaa piaartumik nalilersorneqartariaqartoq Siumup Inatsisartuni ilaasortaatitaa Kulusummiu Lars Poulsen isumaqarpoq.
- Nunatta kangia assigiinngitsorpassuartigut eqqarsaatersorfigisarpara, kommunitut qanoq inissisimanera, maannamullu killiffik qanoq inissisimanera. Qulaajaarusunneq, taavalu nammineq kommuninngoqqissinnaaneq periarfissaanera ulluni makkunani eqqarsaatersuutigaara, Lars Poulsen taama oqarpoq.
Ulunnguaq Markussenip paasiniaanermini ilaatigut kommunerujussuit avinneqarnerata kingunerisaanik tunumiut Nuuk kommuneqatigigaluarlugu ineriartornerup, suliffissanillu pilersitsinissap tungaatigut salliunneqanngisaannarnertik misigisimasut arlaqartut oqaloqatigai.
Tamanna Lars Poulsenip ilalerpaa.
- Isumaqarpunga piaartumik naliliisoqartariaqartoq, naliliineq taanna aamma politikkikkut aaliangernermik kinguneqartinneqartariaqarpoq.
Tunulu immikkut kommuninngornissaa Lars Poulsenip imminut akilersinnaasoraa:
- Isumaqarpunga akilersinnaasoq pissutigalugu ukiuni kingullerni ukkatarineqarnera annertusiartorpoq, suliffinnillu nutaanik pilersitsiviginiarneqarnera aamma oqallisaalluni. Taamaakkaluartoq eqqaamaneqassaaq nunatsinni sunaluunniit tapiissutaannarmik ingerlavoq taamaakkaluartoq upperaarput nunatsinni aningaasarsiornikkut qitiusumik tunu annertoorujussuarmik pilliuteqaqataasinnaasoq, Lars Poulsen oqarpoq.
Ulunnguaq Markussenip ph.d.-liamini aamma tunumiut politikikkut sunniuteqarnissaminnik periarfissakittarnerat, kissaataallu maluginiarneqannginnerusarnerat allaaseraa.
Kingulliunneqartitit misigisut
Ukiorpassuanngortunimi Tasiilami sanaartortoqaranilu suliffissanik pilersitsisoqarnikuunngitsoq, Tasiilami najugalik Elise Uupi Kuitsep Ulunnguaq Markussen ilalerlugu KNR-imut siusinnerusukkut oqaluttuarpoq.
- Kingulliunneqartutut misigisimajuarpugut, ukiorpassuanngortuni sanaartorneqarnikuunngilaq Tasiilami, Tasiilaq alliartunngilaq. Inissarsiortorpassuupput ukiorpassuarni utaqqisartut. Sanaartortoqartaraluaruni suliffissat amerlanerusinnaagaluarput. Taamaalilluni suliffissaaleqisut ikinnerussagaluarput, taanna taamani oqarpoq.
Tunup immikkut kommuninngornissaa Lars Poulsenip Inatsisartuni ukiaanerani ataatsimiinneranni siorna siunnersuutigigaluarpaa, kommunilli avinneqarnissaa immikkut sunniuteqarsinnaanngitsutut nalilerlugu siunnersuut Naalakkersuisut taamani itigartippaat.
