Maniitsumi innuttaasut ataatsimeereerlutik: Qeqqata Kommunianit avissaarusuppugut

Maniitsoq Qeqqata Kommunianit avissaarli.

Maniitsumimi innuttaasunik sapaatit akunnerata siuliani ataatsimiititsinermi peqataasut amerlanerpaartaasa tamanna kissaatigaat. Kommunerujussuimmi pillugit nalileeqqittoqartariaqartoq, taakku isumaqarput.

Maniitsormiu, Hendrik Stach, Maniitsumi innuttaasunik sapaatit akunnerata siuliani ataatsimiititsisuuvoq. Maniitsormiut tusarniarneqassanatik misigisimaleraluttuinnarnerarlutik oqallittut taassumunnga ukiuni kingullerni marlunngulersuni ulluinnarni tusarnartaanngimmata taamaaliussalluni aalajangerpoq.

- Kommunerujussuanngornitta kingorna qinikkat ungasissorujussuarmik pissuseqalerput. Taavalu tamatuma kingunerisaanik qularnanngilluinnartumik Maniitsormiut misigisimaleraluttuinnarsimallutik tusarniarneqassanatik, isummersorfigineqassanatik paasissutissanillu anngussiffigineqassanatik, Hendrik Stach oqarpoq.

Qeqqata Kommuniani Maniitsoq aamma Sisimiut suleqatigiiginnarnissaannut isumaqataavimik taallugu aamma atsiortitsivoq. Atsiortullu 35-usut tamarmik suleqatigiikkunnaarnissamik isumaqataallutik atsiorsimasut, Hendrik Stach aamma oqarpoq.

- Illoqarfitsinni susoqarnissaanik aalajangeeqataarusullutalu pilersaarusioqataarusuttarpugut. Qeqqata Kommuniata Maniitsormiut anngussaat pillugit qanoq iliuuseqartannginnera naammagittaalliutigaat. Maniitsormiut Qeqqata Kommuniatalu akornanni attaveqatigiittoqaavinngilaq, Hendrik Stach oqarpoq.

Kommuneqarfik Sermersuumik suleqateqalernissaq arlaqanngitsut kissaatigigaat Maniitsullu nammineerluni kommuninngoqqinnissaa amerlanerpaartaasa kissaatigigaat, taanna aamma oqarpoq. Taannalu nammineerluni aamma isumaqataavoq.

Maniitsup eqqaani nunaqarfinni aamma atsiortitsiniarput, taakkunanilu atsiortitsinertalimmik isummersortitsereerunik innuttaasunik ataatsimiititseqqinnermi imaqarniliamik kommunalbestyrelsimut anngussiniarput. Qanorlu iliortoqarnissaanik aalajangertoqarumaartoq, Hendrik Stachip neriuutigaa.

Kommunalbestyresimit ilaginnarneqartut

Qeqqata Kommuniata kommunalbestyrelsiani ilaaasortaq Naleqqameersoq, Karl Lyberth, innuttaasunik sapaatit akunnerata siuliani ataatsimiititsinermi aamma peqataavoq.

Kommunerujussuit naliliiffigineqaqqittariaqartut, taanna isumaqarpoq.

- Kommunerujussuanngornitta kingorna Maniitsumi misigisavut nuannersuinnaanngillat. Soorunami aamma nuannersortaqarput, Sisimiunilli suleqateqarneq kingullertigut naammaginngeqaarput. Nammineerlungalumi aamma naammagisimaanngeqaara, Karl Lyberth oqarpoq.

Maniitsormiut peqataatinneqanngitsutut kommunimilu aalajangiinerni oqaasissaqaqataanngitsutut misigisimallutik oqallittarnerat arajutsisimanagu, taanna oqarpoq.

Atsiortitsisoqartareersimasoq kommunalbestyrelsili tamanna pillugu qanoq iliuuseqarsimanngitsoq, taanna oqarpoq.

Maniitsormiullu kommunerujussuunertik pillugu isummersuutaat kommunalbestyrelsimi ataatsimiinnermi kingullermi oqallisigisassanngortissimagini suleqatigiilluartoqarmalli tamanna pisariaqanngitsutut kommunalbestyrelsip nalilersimagaa, Karl Lyberth oqarpoq.

Taamaammat maanna atsiortitsineq kinguneqarumaartoq, taassuma neriuutigaa.

- Qinikkat nuna tamakkerlugu politikerit aamma kommunalbestyrelsini ilaasortat eqqarsaatigalugit, qinikkat paasissavaat Maniitsumi eqqaanilu nunaqarfinni najugallit kommunerujussuit pillugit qanoq isumaqarnersut, Karl Lyberth oqarpoq.

Maniitsorlu nammineerluni kommuninngoqqikkumaartoq, taanna aamma neriuppoq.

Karl Lyberthip siunnersuutaata kommunalbestyrelsimi ataatsimiinnermi kingullermi oqallisigereernerani taasissutigineqarmat Karl Lyberth tamatumani kisimi tapersiimmat siunnersuutaa akuerisimanngikkitsik, Qeqqata Kommuniata borgmesteria Siumumeersoq Malik Berthelsen KNR-imut oqarpoq.