Kommunit kattunneqarnerat pillugu Tasiilarmiut: Namminneq aalajangiissuteqarnerusariaqarpugut

Tunu immini kommuninngornissaanik kissaateqartoqarpat innuttaasut taasitinneqartariaqarput.

Tasiilami innuttaasoq, Elise Uupi Kuitse taama isumaqarpoq. Taanna Tunu Kommuneqarfik Sermersuumut atajunnaarnissaanik kissaateqarpoq.

- Uanga isumaqarpunga isumaq ajunngitsorujussuusoq. Pissutigalugu maanngaanniit aporfissaararpassuarnik ulikkaartaratta. Neriuutigaara kissaatigalugulu pimoorullu sulissutigineqarumaartoq, Elise Uupi Kuitse KNR-imut oqarpoq.

Taanna Kommuneqarfik Sermersuumi, Tasiilami tunguinermik immikkoortortaqarfimmi ataqatigiissaarisuuvoq.

Taassuma isumaginninnermut suliassat piffissangaatsiaq atorlugu suliarineqartarneri maluginiarpai. Innuttaasummi Tasiilamiit ikiorsiissutinik qinnuteqaraangata 600 kilometerisut ungasitsigisumut Nuummut nassiuteqqaartarpai.

- Taamani periarfissaqartarpugut borgmesteri qanimut oqaloqatigisinnaasarlugu. Massakkut assersuutigisinnaavara borgmestererput naluara sumiinnersoq, taanna oqarpoq nangillunilu.

- Taamani kommunit kattussuutinngikkallarmata saaffiginnikkutta ingerlaannaq sullissineq aallartittarpoq, qanimut tikillugit. Massakkut 1000 kilometeri utaqqeqqaarluta aatsaat akissutissarsisinnaasarput. Ilai ullormiit ullormut akineqarsinnaagaluit, ullorpassuanngorlugit utaqqisinneqartarput.

Tunu immini kommuneqaleraluaruni inuussutissarsiornermullu tunngasunik oqartussaaffeqarnerulerunik, tunumi innuttaasut suliffissaaleqisut ikilillutillu imigassamik atornerluineq annikinnerulissasoq isumaqarpoq.

Tunumiummi suliassaralui tigooqqarneqartut, Elise Uupi Kuitse isumaqarpoq.

- Innuttaasut amerlanerpaat suliassaraluaminnik arsaartugaasutut ikkamik, suliassaralui kitaanut nuunneqarput taamaammat suliffissaaleqinerujussuaq aamma taama annertutigaaq. Suliassat uterteqqinneqaraluarpata suliffissaaleqisut ikinnerulissagaluarput, Elise Uupi Kuitse oqarpoq.

Kommuni avinngikkaluarluni oqartussaaqataanerulersinnaavugut

Kommunit kattunneqarnikuunerat Thomas Mikaelsenip allatut isummerfigai.

Kommunip avinneqarnissaa massakkut piffissaanngitsoq taanna isumaqarpoq, taanna Tasiilami sanasutut namminersortuuvoq. Kommuninilli allaffeqarfiit illoqarfinnut agguataarneqarnissaat taassuma kissaatigineruaa.

- Uanga takorloorpara pisortaqarfik arlaat Tasiilamut inissinneqassasoq, pisut qanimut tikillugit. Assersuutigalugu arlaannik sakkortuumik aatsaat pisoqartillugu ikiuigasuartussat taamaallaat pisortaqarfimmiit takkuttarput, Thomas Mikaelsen KNR-imut oqarpoq.

Isumaginninnermut immikkoortortaqarfik Tasiilamut inissinneqarneratigut innuttaasut ineriartortinneqarsinnaasut taassuma takorloorpaa.

- Uanga isumaqarpunga isumaginnittoqarfimmi ingerlatsineq, inuit ineriartornissaannik ingerlatsineq Tasiilap illoqarfiani takussaanerusumik tigussaanerusumik suleriuseq aallartinneqartariaqartoq, imatuunngitsoq aatsaat pinasuartumik pisoqaraanga suliniuteqartoqartarluni, Thomas Mikaelsen  oqarpoq.

- Paamiut, Tasiilaq Ittoqqortoormiillu arlaatigut akisussaaffinnik inissiivigineqartariaqartut isumaqarpunga. Illoqarfikkaarluta ikioqatigiinnikkut ajornartorsiutit ilorraap tungaanut aallarnissaat upperaara.

Innuttaasut isumaat tamarmik assigiittanngimmata erngertumik qanoq iliortoqarnissaanik aalajangiisoqarani isummat assigiinngitsut tusarniarneqaqqaarlutik eqqarsaatigilluakkamik aalajangiisoqarnissaa, taassuma kissaatigaa.

Han pointerer også, at der er forskellige meninger om det hele, og at han derfor ikke ønsker en hurtig beslutning, hvad angår kommunen, men at man i stedet samler alle holdninger og tænker grundigt over, hvad fremtiden skal byde.