Tunup immikkut kommuninngornissaa illuatungiliuttut ammaffigaat

Illuatungiliuttut tamarmiusut Demokraatit, Atassut Nalerarlu tunup immikkut kommuneqalernissaanut piareersimapput.

Partiit illuatungiliuttuf siulittaasui KNR-imut taama oqarput.

Kommunerujussuit 2009-mi atuutilermatalli, tunup immikkut kommuninngortinneqarnissaa arlaleriarluni oqallisaavoq.

Kommunerujussuanngunngikkallarmata tunumi Ittoqqortoormiit Ammassalillu immikkut kommuneqarput, taakku maanna Kommuneqarfik Sermersuumut ilaapput.

Ulunnguaq Markussenip Ilisimatusarfimmi ph.d-liornermini misissugai saqqummereersullu, oqallinneq Inatsisartunut ilaasortamit Lars Poulsenimit (S) aallarteqqinneqarpoq. 

Kingornalu Ilisimatusarfimmi ilisimatusartuuneq Birger Poppel KNR-imut oqarpoq kommunip avinneqarnera Tunumut iluaquteqarsinnaasoq. 

Misissorluarneqartariaqarpoq

Inatsisartunut ilaasortap, Atassutip siulittaasuata Aqqalu Jerimiassenip kommunip avinneqarnissaanik misissuisoqarnissaa ammaffigaa. Taamaaliortoqassappalli innuttaasut akuutinneqarluarlutik, qulaaniit aalajangigaanngitsumik misissorluakkamillu aallaavilimmik aalajangiisoqarnissaa oqariartuutigaa.

- Qulaaniit aalajangikkamik inissiinaveersaassaagut. Iluamik suliaralugu aaqqinneqarnissaa uagut oqaloqatigiissutigisinnaavarput, qulequtaasorlu tapersersorlugu, Aqqalu Jerimiassen oqarpoq.

Innuttaasut oqariartuutaaat naapertussagaanni kommunit maanna inissisimanerat ilanngitsoq Demokraatit isumaqarput. Inatsisartunut ilaasortap, partiimilu siulittaasup Jens Frederik Nielsenip kommunerujussuit 2009-mi atuutilernerani siunertaq isumaqatigigaluarlugu piviusumi iluatsinngitsoorsimanerarpaa.

- Taamanikkut kommunit kattunneqarnerinut isuma siunertarlu pitsaaqutaasinnaasullu tamakkiisumik taperserpagut. Taamaattorli piviusup takutippaa innuttaasut amerlasoorpassuit iluarinngikkaat. Taamaammat misissuinerit sukumiisut ingerlateriarlugit kommunit aveqqinnissaannut oqallinnissamut piareersimavugut, taanna oqarpoq.

Taamaaliortoqassapalli sukumiisumik misissuisoqartariaqartoq, Demokraatit isumaqarput.

- Kommunit avinneqarnerat ajornartorsiutit naassaanngitsumik aaqqinneqarneranik isumaqarnavianngilaq. Kommunit aveqqinneqassappata, tunu immikkut kommunitaassappat soorunami misissuinerit sukumiisut pissarsiareqqaartariaqarpagut sunniutissaa, pingaarnerpaaq unaavoq innuttaasut kommunimiit qanimut sullinneqarnerata ajorseriannginnissaa qulakkeerneqartariaqarpoq. Tassunga killissinnaagutta kommunit aveqqinnissaanut Demokraatininngaanniit oqalliseqataanissarput qularutigineqassanngilaq, Jens Frederik Nielsen oqarpoq.

Nunatsinni kommunit sinnerisa agguataarneqarnerisa misissornissaat, partiit siuttuisa piareersimaffigaat.

Kommuni amerlanerusut piumaneqartut

Naleqqap siulittaasuat, Inatsisartunilu ilaasortaq, Pele Broberg naapertorlugu, tunu Kommuneqarfik Sermersuumiit anilluni nammineq kommunitaarnissaa partiip anguniaraluarpaa.

Kommunit 2009-mi kattussuunneqarnerani anguniakkat maannamut piviusunngortinneqarsimanngitsut, Pele Broberg isumaqarpoq.

- Suu, ataasinnguamilluunniit ajortussatut isiginngilarput. Kingumut qiviaraanni kommunit kommunerujussuanngortinneqarmata neriorsuutaasimasut naatsorsuutaasimasullu qiviaraanni sipaarfissarujussuarooq neriorsuutigineqartoq ataasinnguamilluunniit taanna piviusunngortinneqanngilaq, taanna oqarpoq.

Kommuneqarfik Sermersooq kisiat pinnagu kommunit allat aamma avinneqarsinnaanerata misissorneqarnissaa Naleqqamiit ammaffigaat. Naleqqami ilaasortat ilaata Avannaata Kommuniata avinneqarnissaa siunertaralugu inuttaasut akornanni misissuisitsisoqarnissaa siornatigut qaqereerpaa.

- Qeqqata kommuniani Karl Lyberthep kommunimi ataatsimiinnermi qaqinnikuuaa, maanilu Sermersuumi isumaqatigiinniarnermi aamma Tunu immikkut qaqinneqarpoq, Pele Broberg oqarpoq.

Kommunit 2009-mi kattussuunneqannginnerani katillugit kommunit 18-iupput.