Ilisimatusartuuneq: Tunu immini kommuninngussappat innuttaasut aperineqarnissaaat takorloorneqarsinnaavoq

- Taamaaliortoqassappat tunumiut oqartussaaqataanerulernissaat naatsorsuutigineqarluarsinnaavoq, Ilisimatusarfimmi ilisimatusartuuneq, Birger Poppel tunumiut Kommuneqarfik Sermersuumiit ilaajunnaarsinnaanerat pillugu oqarpoq.

Ulunnguaq Markussenip Ilisimatusarfimmi ph.d-nngorniutigalugu tunumi misissuisimanini saqqummiummagu, Inatsisartunut ilaasortap, Lars Poulsenip (S) tunumiut immikkut kommuneqalernissaat apeqqutigaa.

Ulunnguaq Markussenip ph.d.-liamini tunumiut politikikkut sunniuteqarnissaminnik periarfissakittartut, kissaataallu maluginiarneqannginnerusartut malugaa.

Taanna oqallisigineqartariaqartoq Lars Poulsen isumaqarpoq. Tunup immikkut kommuninngornissaa Lars Poulsenip Inatsisartut siorna ukiaanerani ataatsimiinneranni siunnersuutigigaluarpaa, Kommuneqarfik Sermersuulli siunnersuut taanna sulinermut naapertuutinngitsutut nalilerpaa.

Lars Poulsen nammineerluni Kulusumminngaaneerpoq, tunu Kommuneqarfik Sermersuumut atagaluarluni kitaanituulli ineriartorfiunanilu suliffissaqartiginngitsoq isumaqarpoq.

Innuttaasut aalajangissavaat

Kommunerujussuarnut 2009-mi kattussuutinnginnnermitulli tunumiut namminneq kommuneqaqqilissappata, innuttaasut taasissutigisssagaat, Birger Poppel isumaqarpoq.

- Politikikkuinnaq aalajangiiffiussanngippat tunumi nunaqarfinniittut illoqarfimmiittullu taasineratigut inernilerneqarsinnaasoq takorloorsinnaavara.

Tamatuma oqalissaaqqilernera taassuma tupaallaatigivallaangilaa.

- Siusinnerusukkut oqallisaalersimannginnera tupaallaatigineruara, Birger Poppel oqarpoq.

Aningaasat aalajangiisuussapput

Tunumi suliffissaaleqineq imigassamillu atornerluineq ajornartorsiutaangaatsiarpoq. Ajornartorsiutit Kommuneqarfik Sermersuumit aaqqinniarneqartarput, tunuli immini kommuninngussagaluaruni tamakku namminneq akisussaaffigilertussaavai.

Birger Poppelip oqarnera naapertorlugu, tunu immini kommuninngussagaaluaruni kommunit allat assigalugit aningaasaliiffigineqartassagami, aningaasatigut unammillernarpallaarnavianngilaq.

- Nunatsinni kommunit Namminersorlutik Oqartussaniit aningaasaliiffigineqartarput. Taamaammat akissaqartinneqarnisaat qularnanngilaq, taanna oqarpoq.

Taamaammat kommunip sullissinerata pitsaassusaa ajornerulernavianngitsoq, taassuma siulittuutigaa. Isumaginninnermik sulinermi Nuummeersunik ikiorserneqartareerput, siunissamilu akiliuteqartarnikkut suli taamaaliortoqarsinnaassaaq.

Inuilli akisussaassusilimmik sulerusuttut tamaasa iluaqutigalugit atorfissaqartinneqassasut, Birger Poppel oqarpoq.

- Nukissaqartariaqarpoq aamma aningaasat agguataarnissaanut nukissaqartoqartariaqarluni, taamaalilluni oqartussaaqataarnerup nukittorsarneqarnissaa anguneqassaaq.

Tunu nammineerluni kommuneqaleruni politikerillu najukkaminni sulilerunik sumiiffimmi imigassamik ajornartorsiutit qanimut suleqataaffigineqalerpata iliuuseqarfigineqarnerusinnaanerat, Birger Poppelip ilimagaa, ullumikkummi ungasianiit Nuummiit aqunneqarnerummata.

- Iliuusissat qaninneerusumiit aalajangerneqarpata, sukumiinerusumik suliarineqarsinnaasarfiaaqaraluarput, Birger Poppel oqarpoq.