Borgmesteri Tunu pillugu: Innuttaasut kommunererusutaminnik kommuneqassapput

Kommuneqarfik Sermersuumi borgmesterip, Avaara Olsenip kommunit agguataarneqarnerata nalilersorneqarluartarneri peqqinnartuusoraa. Tunumili imminni kommunitaarnissartik kissaatigippassuk, mattukkusunngilai.

Allattoq Marie Kûitse Kristensen, Martin Pedersen, Aviâja Kilime

marsip 15-at 2023 07:01

Tunumi imminni kommuneqalissappat?

Kommunit 2009-mi kattussuunneqarnerata kingorna tunumiut Kommuneqarfik Sermersuumut ilanngunneqarmatali apeqqut taanna qaqilerneqarluartarpoq oqallisaallunilu.

Ph.d.-nngorniutigalugu misissuisup, Ulunnguaq Markussenip tunumiut oqartussaaqataanikitsutut, politikikkullu akuutinneqarpianngitsutut misigisimasut oqaloqatigisimasani saqqummiummagit oqallinneq aallarteqqippoq.

Kommuneqarfik Sermersuumi borgmesteri, Avaaraq Olsen, kommunalbestyrelsinut ilaasortat aalajangersakkat aallaavigalugit sulisarpoq, Tunuli immini kommuninngussagunik kommunalbestyrelsit kissaatiminnik tunniussinissaat piumasaqaataavoq.

Innuttaasut aalajangissavaat

Innuttaasut isummersornerat Avaaraq Olsenip ammaffigai, taakkulu aalajangiisuussasut taanna isumaqarpoq.

- Oqallinneq qanoq aallaaveqarnera soorunami soqutigineqarpoq. Uanga nammineerlunga kissaatiginerpaavara innuttaasut kommunererusutaminnik kommuneqassasut, taamaammat kangianiit kissaatigineqassappat nammineq kommuninngornissartik, uanga nammineerlunga soorunami killilersuiffiginavianngilara, taanna oqarpoq.

Tunuli Kommuneqarfik Sermersuumut ataannaraluarluni frikommuninngornissaa misissorneqalereersoq, ilanngullugu oqaatigaa.

Nalilersueqqinneq peqqinnartoq

Tunumiut saaffiginnissutaasa ungasianiit aalajangiiffigineqartarnerat misigisartagai, borgmesterip paasilluarsinnaavai. Aalajangiisoqannginneranili ilisimasanik tunngaveqartumik taamaaliortoqassasoq taassuma kissaatigaa.

- Massakkut oqallinnerit assigiinngitsut, uanga nammineerlunga aallaavigalugit misigissusermiit aallaaveqarput, taamaammat paasititsiniaagutta aatsaat iluamik taakku takusinnaalissavarput kommunit avinneqarpata sutigut pitsannguuteqassava, sutigut pitsaavallaanngitsumik innuttaasunut kinguneqarsinnaava, Avaaraq Olsen oqarpoq.

Aamma atuarukTunup immikkut kommuninngornissaa illuatungiliuttut ammaffigaat

Tunumi imminni kommunitaarusussappata kissaataannik mattusserusunngilaq, tunumiut namminneq iliuuseqarusunnerat ajunngitsuusoq taanna isumaqarpoq.

- Isumaqarpunga peqqinnartuussoq qaqugukkulluunniit taamatut naliliisarnissaq. Taamaammat naliliisoqarnissaanik kissaateqartoqarpat aamma taanna tikilluaqquara.

Tunumiulli imminni kommunitaassagaluarpata Inatsisartut aalajangiisuujumaartut Avaaraq Olsenip erseqqissaatigaa.