Kommunip agguaanneranik misissuineq aallartinneqartoq: Innuttaasut qisuariaataat tusaanngitsuusaarsinnaanngilagut

Piffissami kingullermi tunu nammineq kommuneqalissanersoq politikkikkut innuttaasullu akornanni oqallisigineqarpoq.

Nunatsinni kommunini allami arlalinni aamma oqallittoqarpoq.

Naalakkersuisut suleqatigiissitamik periarfissamik aamma kommunit nutaamik agguaanneqarnissaanik kissaateqarnermik misissuisussamik maanna pilersitsipput. Nunamut imminermut naalakkersuisoq, Jess Svane (S) tunumi nammineq kommuneqalernissaanik oqallinnermut atatillugu kommunini borgmesterinut tamanut februaarimi ataatsimiinnermi tusarniaasoq oqarpoq.

- Kommunit agguataarneri pillugit Inatsisartuni oqallinneq, innuttaasullu atsiornernik tunniussisarneri kommuninut akisussaasutut isiginngitsuusaarsinnaanagillu tusaanngitsuusaarsinnaanngilakka, Jess Svane oqarpoq.

Suleqatigiissitaq kommunit agguaanneqarneranik apeqqummik ilaatigut misissuisussaq Naalakkersuisunit kiisalu nunatsinni borgmesterinit pilersinneqarpoq.

Namminersorlutik Oqartussat atorfilittaat kommunimilu pisortaanerit alloriarnissap tulliata suunissaanut saqqummiussissasut ataatsimiinnermi aalajangerneqartoq, Jess Svane oqarpoq.

Politikkikkut ataqatigiissaarinermi ataatsimiititaliaq tulliani aggustimi ataatsimiissaaq, tassanilu innuttaasut akornanni isumammat ilaatigut misissorluarneqassapput.

- Innuttaasut atsiornernik katersinerannut assingusunullu atatillugu qanoq tulliuttumik alloriartoqassanersoq oqaluuserineqassaaq, Jess Svane oqarpoq.

Saniatigut innuttaasut naammagisimaarinninneranut atatillugu aamma misissuisoqarpoq. Taanna innuttaasunut sullissinermik inuillu ataasiakkaat sunniuteqarsinnaanerannik tunngaveqartumik kommunip aaqqissuussaaneranik nalilersuinermik kinguneqassaaq. Naliliineq taanna Inatsisartunut 2024-mi saqqummiunneqassaaq.

- Innuttaasut atsiornernik tunniussisarneri kommuninut akisussaasutut isiginngitsuusaarsinnaanagillu tusaanngitsuusaarsinnaanngilakka, Naalakkersuisoq, Jess Svane oqarpoq.

Kommunerujussuit maanna atuuttut, kommuninit 18-init 2009-imi sisamaannanngortinneqartut kingornalu tallimanngortinneqartut ukiut ingerlanerini oqallisigineqangaatsiartarput.

Misissuineq una ph.d-nngorniamit Ulunnguaq Markussenimit misissorneqarpoq, misissuinermilu tassani tunumiut tamat oqartussaaqataanerannik ungasippallaartutut misigisimasut politikkikkullu iluamik sunniuteqartutut misigisimanngitsut takutinneqarpoq. Tamanna pissutigalugu Inatsisartunut ilaasortap, Lars Poulsenip (S) tunup nammineq kommuneqalernissaa siunnersuutitigalugulu Naalakkersuisoq Jess Svane § 37-mik apeqquteqaateqarfigaa.