Nanortalik avissaarniarpoq: Pingaarnersiuinermi kingulliunneqartuartarpugut

- Inissiat matoornikut, aqquserngit sumi tamaani putoornikut, naak aningaasatigut Nanortalik aamma annertoorujussuarmik pilliuteqartaraluartoq kommunitsinnut, kisianni pingaarnersiuinermi kingulliunneqartuartarpugut, iluamillu tusaajumaneqassanata.

Nanortallip Kommune Kujallermit avissaarnissaanut atsiornermik katersinermik aaqqissueqataasoq, Minik Serano Frederiksen oqarpoq.

Innuttaasut 1.500-t affaat sinnerlugit Nanortallip namminerisaminik kommuneqaleqqinnissaanut atsioreersimapput.

Tamannalu qitiusumik allaffeqarfimmit kiffartuunneqarnerlunnermik, illoqarfimmi ineriartortoqannginneranik sumiiffiullu pingaarnersiuinermi kingulliunneqartarneranik ilaatigut pissuteqartoq, Minik Serano Frederiksen oqarpoq.

- Atorfippassuit Qaqortumut nuunnikuugamik, taamaasilluni nunaqarfimmiortagut illoqarfimmilu maani Nanortalimmi saaffiginniffissaat killeqartorujussuupput.

Atorfiit atulerseqqinneqassasut

Minik Serano Frederiksen nammineerluni arlalinnik suliffiuteqarpoq. Assersuutigalugu aasaanerani takornarianik angallassisartutut ilisimaneqarpoq, Nanortalimmiullu akileraarutitigut Kommune Kujallermut isertitarisartagaat illoqarfimmi ineriartortitsinermut annerusumik atorneqarneq ajornerarpai.

- Pingaarnersiuinermi amerlanertigut kingulliunneqartuarpugut, illoqarfinnguarpullu nuannertigaluni ajoraluartumik ammuinnaq ingerlanikuuvoq.

Taassuma atorfiit Nanortalimmit nuunneqarsimasut atulerseqqinneqarnissaat kissaatigaa.

Taamaammat atsiornernik katersinermi aaqqissueqataavoq.

Kommune Kujallermi qinikkat Qaqortumi februaarip 14-iani ataatsimiippata Nanortalimmit eqqaaniillu atsiornerit tunniunneqassapput.

Stine Egede (IA) Kommune Kujallermi borgmesteriuvoq. Taassuma Nanortallip nammineq kommuninngorniarneranut kissaateqarneq suliassatut allatulli suliarineqassasoq allakkatigut akissutigaa.

Maniitsoq aamma avissaarusuttoq

Illoqarfiit ilorrisimaannginnertik pissutigalugu kommuneqatigisaminnik avissaarusunnerat siulliunngilaq.

Maniitsoq Qeqqata Kommunianut siorna maajimi ilaarusukkunnaarpoq.

Illoqarfimmi innuttaasut kommunip pilersaarutaanik tusagaqanngisaannarnertik iluarinagu tunngavilersuutigaat. Aamma sumilluunniit paasitinneqartarsimanatik oqaatigaat.

Atsiornernillu katersititsineq aallartinneqarpoq - tamannali itigartitsissutigineqarpoq.

Kommunalbestyrelsimi oqallittoqarnerata kingorna borgmesterip, Malik Berthelsenip (Siumut) siunnersuut itigartitsissutigineqartoq KNR-imut oqaatigaa. Maniitsumiimmi ilaasortaq ataasiinnaq, tassalu Karl Lyberth partii Naleqqamit kisimi akuersisuummat.

Tunumi Kommuneqarfik Sermersuumit avissaarnissaq aamma oqallisigineqallattaasarpoq.