Nanoq Beerimi unioqqutitsisoqarsimanersoq Politimestereqarfiup naliliiffigisussanngorpaa

Sermitsiami ullumi saqqummersumi tamanna allaaserineqarpoq, akiliisinnaajunnaarnermilu pigisanik nakkutilliisoq, eqqartuussissuserisoq Jens Paulsen, issuaavigineqarpoq immiorfiup 2012-imut ukiumoortumik nalunaarusiaata atuaqqissaarnerani paasissutissanik politiit misissuinerannut soqutiginaateqarsinnaasunik nassaarsimalluni.

AAMMA ATUARUK Nanoq Beer peqqusersusaarluni royaltymik akiliisimanngilaq

Eqqartuussissuserisup saaffiginnissutaani sutigut unioqqutitsisoqarsimanera oqaatigineqanngilaq, Sermitsialli paasissutissat pissarsiarisimasai naapertorlugit imigassamut akitsuut pillugu Namminersorlutik Oqartussanut nalunaaruteqartoqarsimannginnera ilaatigut pineqarpoq.
 
Ukiumoortumik nalunaarusiami aamma atuarneqarsinnaavoq Nanoq Beer tunisassiornerminik toqqorsivimmiittuuminillu nalunaarsuisarsimanngitsoq. Aammattaaq akileraarutinik A-nik oqartussaasunut piffissaq eqqorlugu akiliisoqarsimanngilaq, kiisalu aamma Tuluit Nunaannut Nanoq Beerip immiortitsiffigissaanut imermik nassiussinermut royaltymik akiliisoqarsimanani.

AAMMA ATUARUK Kukkunersiuisoq: Nanoq Beerip naatsorsuutinik tunniussisimannginnera eqqumiilluinnarpoq

Nanoq Beerimi siulersuisunut siulittaasuusimasup, Jørgen Wæver Johanseni,p Sermitsiap allaaserisaani paasissutissat oqaaseqarfigerusunngilai,  misissuisoqassappalli tamatuma inernera eqqissilluni utaqqissanerarlugu.
 
Nanoq Beerip pisortarisimasaa Gerhardt Petersen Sermitsiap oqaaseqartissinnaasimanngilaa.

AAMMA ATUARUK Aningaasaleeqataasup Nanoq Beer eqqartuussivilersuunnialersaaraa