Aningaasaleeqataasup Nanoq Beer eqqartuussivilersuunnialersaaraa
Tassa Nanoq Beerip siuttorisimasai, Atassutip siulittaasuata Gerhardt Petersenip aamma borgmesterip Jørgen Wæver Johansenip, eqqartuussivilersuunneqarnissaat piareersarneqaleruttortoq, aviisimi Atuagagdliutini ullumi allaaserineqarpoq.
Nanoq Beerimik aningaasaleqataasimasup, Inuit Ataqatigiit sinnerlugit Inatsisartuni ilaasortap Kalistat Lundip, aningaasat sumut atorneqarsimanersut paaserusuppai:
- Maanna aningaasaliisut allat attavigissavakka qanoq eqqarsaatersornersut paasiniarlugu, taamatuttaarlu suliamik ingertatitseqqikkusunnersut paaasiniarlugu, Kalistat Lund oqarpoq.
Nunatta karsia suliffeqarfimmik ingerlatsisunut tusaamasanut aningaasaliissutiminik, taarsigassarsiarititaminik qularnaveeqqusiissutimigullu 2,8 millionit koruuninik annaasaqarpoq.
Suliffeqarfiup akiliisinnaajunnaarnerata nalunaarutigineqarnerani aamma paasinarsivoq 2012-imut 2013-imullu naatsorsuusiortoqarsimanngitsoq.
Namminersorlutik Oqartussat suliffeqarfiutaat aningaasaliisartoq Greenland Venture, akiliisinnaajunnaarnerup kinguneranik 1,3 millionit koruuninik aamma annaasaqarpoq, naatsorsuusiortoqarnissaanillu kingorna suliaqartitsilluni.
Asuli ingerlatsisoqarsimaneranik taakku takussutissiisut, AG-p allaaseraa, tassami naatsorsuusiortussaatitaanerup eqqortinneqarsimannginnera aamma paasinarsimmat, soorlu aamma naalagaaffimmut akitsuutinik kiisalu pigisanik nalilinnik tunisassialluunniit nalunaarsorneqarsimannginnerannik takussutissiisoqarmat.
Nanoq Beerip ingerlanneqarnerata nalaani 1,4 millionit koruunit sinnerlugit akissarsianut aamma akiliisoqarsimasoq saqqummiunneqarpoq, taakkunanngali qanoq amerlatigisut Jørgen Wæver Johansenimut Gerhardt Petersenimullu tunniunneqarsimanersut ilisimaneqanngilaq.
