Kukkunersiuisoq: Nanoq Beerip naatsorsuutinik tunniussisimannginnera eqqumiilluinnarpoq
-Imaassinnaavoq suliffeqarfiup aqutsisuisa nalillersimagaat suliffeqarfiup matuneqarnissaanut tamanna akikinnerpaassasoq. Kisianni taamaaliortoqartarnera qaqutigoorluinnarpoq, Jens Frederiksen oqarpoq.
Taanna Nanoq Beerip naatsorsuutaanik pioreersunik kingullernik kisiartaasunillu Qanoruup misissuitissimavaa suliakkersimavaa, naatsorsuutillu taakku suliffeqarfiup atuunnerani qaammatinut siullernut 16-inut atuupput. Jens Frederiksenill naatsorsuutini aarlerinarsinnaasinnaasunik takusaqanngilaq.
-Naatsorsuutit annertujaamik amigartooruteqarfiupput, aqutsisut aamma allapput 2012-imi amigartooruteqarnissartik naatsorsuutigalugu. Aamma 2014-ip ingerlanerani sinneqartooruteqalernissartik naatsorsuutigalugu allapput. Suliffeqarfinnut aallarterlaanut tunngatillugu tamanna takornartanngilaq, Jens Frederiksen oqarpoq.
Kukunersiuisorli piumasarineqartutigut kukkunernik nassaarsimavoq. Siullertut sulisut akileraarutaat A-t piffissaq eqqorlugu akilerneqartarsimanngillat, naak sulisut akissarsiaannit pisarneq malillugu ilanngaatigineqartarsimagaluartut. Kingornali akileraarutit A-t akilerneqarsimarpasipput. 2011-mut ukiumoortumik naatsorsuutit aamma piffissaq eqqorlugu tunniunneqarsimanngillat.
-Taakku pipallatatut ingasagisassaanngitsutullu taarusuppakka.
Kukkunersiuisarfiup BK Revisionip Nanoq Beerip naatsorsuutaanik kukkunersiuisuusup suliffeqarfiup matoqqajaaneranut takussutissanik maluginiagaqarsimanngilaq.
-Suliffeqarfiup akiliisinnaajunnaarsinnaanera aarlersimasuugunikku, tamanna naatsorsuutini allaqqasimassagaluarpoq, Jens Frederiksen oqarpoq.
Nanoq Beerip ukiup ataatsip qaangiunnerani pinngitsaaliissummik atorunnaarsinneqarneranut sunarpiaq peqqutaanersoq suliffeqarfimmik piginnittuusut, ilaatigut Kommune Kujallermi borgmesterip, Jørgen Wæver Johansenip (S) Inatsisartunullu ilaasortap Gerhard Petersenip (A) kisimik ilisimavaat. Oqaatigineqareersutut, sutigut ajutoortoqarsimaneranik takutsitsisinnaasunik 2012-imut naatsorsuutinik tunniussisoqarsimanngilaq.
