Namminersorlutik Oqartussani atorfilik qimuttuitsut ajutoorneranni ajunaartunut ilaavoq
Taammaattorli ajunaartut tamakkiisumik suli kinaassusersineqarsinnaanngitsut politiit nalunaarutigaat, ajunaartullu tassaasut arnat tallimat angutillu pingasut oqaatigisinnaasimallugu.
Angut Danmarkimeersoq 30-nik ukiulik, Namminersorlutik Oqartussani Peqqissutsimut Naalakkersuisoqarfimmi atorfilik ajunaartunut ilaasoq, Facebookikkut ilaatigut allaaserineqarpoq.
Ajunaartup ilaqutaasa Facebookikkut tamanna ilaatigut allaaseraat.
Ajunaartut ullumi ullup ingerlanerani tamakkiisumik kinaassusersineqarsinnaanissaat naatsorsuutigineqartoq, politiit nalunaarutigaat.
- Ajunaartut akornanni sisamat politiit kinaassusersisinnaasimavaat, ajunaartullu sinneri sisamat ullumi ullup ingerlanerani kinaassusersineqarsinnaanissaat naatsorsuutigalugu, Fynip politiivi tusagassiutinut nalunaarummi taama ilaatigut allaaserisaqarput.
- Tamakkiisumilli maannamut kinaassusersiisoqarsinnaasimanngilaq, Fynip politiivi naggasiillutik oqarput.