Naalakkersuisuuffimi annaanera Enoksenip uggorigaa
Kim Kielsenip naalakkersuisuni nikititerinerani kingullermi Partii Naleqqameersoq Hans Enoksen aalisarnermut piniarnermullu naalakkersuisussatut oktobarip qaammataani toqqarneqarpoq.
Ukiullu affaa qaangiummat nikititerisoqaqqippoq naalakkersuisullu siulittaasorisimasaat suliassaqarfik alla naalakkersuisuuffigisussanngorpaa. Hans Enoksen inuussutissarsiornermut, suliffeqarnermut, niuernermut nukissiuuteqarnermullu naalakkersuisunngortinneqarpoq. Enoksenip aalisarnermut piniarnermullu naalakkersuisuuginnarusukkaluarluni KNR-imut oqaatigaa.
- Aalisarnermut piniarnermullu naalakkersuisoqarfiup qimattariaqarnera assut uggoralugu isertuutissanngilara, taama oqarpoq imalu itisiliilluni:
- Ilisimasakka misigissutsikkalu aalisartuniipput piniartuniillutillu, aamma suliakka tatiginartumik naammassisimallugit misigisimavunga. Taamaammat tassani uninnissara oqimaappoq, Hans Enoksen Qanoruumut taama oqarpoq.
AAMMA ATUARUK GE-p SIK-llu pisassiissutit sorsuutigigaat
Partii Naleqqap siulittaasua siornatigut aalisarnermut piniarnermullu naalakkersuisuusimasumit taarserneqarpoq. Tassalu Karl-Kristian Kruse, ilaquttani piffissaqarfiginerujumallugit naalakkersuisutut siorna maajip qaammataani tunuartoq.
Hans Enoksenilli pinngitsaalineqarluni naalakkersuisuuffini qimanngilaa. Kim Kielsen Qanoruumi nassuiaavoq Vittus Qujaukitsup - akerliulluni Naalakkersuisunit ataasinngormat tunuartup - akisussaaffeqarfigisai arlallit Enoksenip isumagerusunnerai aperisimallugu. Partii Naleqqallu siulittaasua tamatumunnga 'akuersivoq'.
AAMMA ATUARUK Vittus akerliugami naalakkersuisuujunnaartoq