Inatsisartut ammaanersiornerat maana malinnaaffigiuk
Inatsisartut ukiaanerani ataatsimiinnerat ullumikkut aallartippoq.
Ileqqoq malillugu Inatsisartunut ilaasortat Hans Egedep illuaniit Annaassisitta oqaluffianut pisoqatigiillutik naalagiariartorput.
Hans Enoksenilu eqqaaniarniarlugu biskoppi Paneeraq Siegstad Munk naneruummik ikitsivoq, minutsilu ataaseq nipaallisimaartoqarpoq.
Annaassisitta oqaluffiani naalagiareernerup kingorna Inatsisartut ataatsimiittarfianut ilaasortat pisoqatigiipput.
Inatsisartut ukiakkut ataatsimiinnerat politikkikkut sulinermik aallarnerneqarpoq, tassani ilaatigut nunatta siunissaanut pingaarutilimmik aalajangiinerit ataatsimiissutigineqassallutik.
Aningaasaqarnermut inatsisissaq ilaatigut ullormut oqaluuserisassani ilaavoq, taannalu nunatta ineriartornerani ulluinnarnilu allannguinermik isumaqarsinnaavoq.
Inatsisartut Ukiaanierani ataatsimiinnerat ammarpoq. Inatsisartullu siulittaasuat Kim Kielsen (S) ataatsimiinneq ammarlugu oqaaseqarpoq.
Ukiorpassuarni politikkikkut sunniuteqarsimasoq Hans Enoksen Inatsisartut ataatsimiittarfiani eqqaaniarneqaqqippoq tassani erinaq Nunaqarfiga Seqinnarimmi Efraim Josefsenimit taalliarineqartoq Johannes Berthelsenimit Pipaluk Lynge Berthelsenimiillu erinarsorneqarpoq.
Eqqaaniaasoqareermat Inatsisartunut Siulittaasussamik taasisoqarpoq Kim Kielsenilu (S) taaguunneqarnerpaalluni siulittaasunngoqqippoq.
Naalakkersuisut Siulittaasuat Jens Frederik Nielsen (D) ammaanersiornermi siullermeerluni oqalugiarpoq.
Inatsisartut Ukiaanerani ataatsimiinnissamut ammaanersiornerat ataatsinut tanneq qulingiluanngortoq naammassivoq.
Ukiaaneranilu ataatsimiinneq ataasinngornermi nangeqqinneqassaaq.
Inatsisartut oqaluuserisassaat ulluni 31-ni ataatsimiiffiusussani 119-iupput. Taamaammat ukiakkut ataatsimiinneq pilersaarutit malillugit februarip ulluisa aqqarngani naammassinissaanut nalinginnaasumit sivisuneruvoq.
