Politiit ullormut nalunaarutaat: Sisimiuni tillinniartoqaqattaartoq, Tasiilamilu angut ujaarineqartoq

- Sisimiuni maannakkorpiaq tillinniartoqaqattaarpoq, Kalaallit Nunaanni Politiini pigaartut pisortaat Carl Sværd tallimanngornermi ullaakkut oqarpoq.

ATV-llu pingasut unnuaq tillinneqarmata taama pisoqaqqippoq.  Politiinut nalunaaqutaq 02.44 nalunaarutigineqarpoq, politiillu inuit arfinillit ATV-ni pingasuniittut malersorsimagaat, pigaartut pisortaat oqaluttuarpoq.

- Unnuaq malersuineq sakkortulaarsimavoq, apuinermik kinguneqangajakkami, Carl Sværd oqarpoq.

Taamaattumik politiit malersuinertik unitsittariaqarsimavaat, unioqqutitsisullu arfiniliusut ujaarineranni politiit ikioqqupput.

- Pisumut tamatumunnga takunnissimasoqarpat ilisimasaqartoqarpalluunniit, politiit Sisimiuni innuttaasuniit attavigineqaqqupput, Carl Sværd oqarpoq.

Tasiilami ujaarineqartoq

Tasiilami angut 30-nik ukiulik ippassaq nal. 16 missaani kingullermik takuneqarsimasoq pillugu politiit aamma ikioqqupput.

- Ippassaq ullaakkut qulit aqqarngullu akornanni illoqarfimmit aallarsimavoq nikallungalluni, Tiniteqilaallu eqqaani nalunaaqutaq sisamat missaani kingullermik takuneqarpoq, Carl Sværd oqarpoq.

Ippassarli angerlarsimanngilaq,  ilaqutaalu nalunaaqutaq 22.33 politiinut kalerriipput.

Angut umiatsiamik Yamarin 6600-mik 300 hestekræftilinnik motoorilimmik, glasfiberimik qallerneqarsimasumik angallateqarluni aallarpoq, pigaartut pisortaat oqarpoq, innuttaasuniillu ikioqquvoq.

- Angut taanna pillugu ilisimasaqaruit politiit attavigineqarusupput, pigaartut pisortaat oqarpoq.

Angut taanna takusimagukku imaluunniit taanna pillugu ilisimasaqaruit – imaluunniit unnuaq Sisimiuni pisimasoq pillugu ilisimasaqaruit – Kalaallit Nunaanni Politiit uunga saaffigisinnaavatit 70 14 48.