IIanngaassiviup atuutilersinneqarnissaa kinguartinneqarpoq
Aningaasaqarnermut Naalakkersuisoq tusagassiuutinut nalunaaruteqarluni allappoq, inatsisartut ukiakkut ataatsimiinnissaanni Ilanngaassivik pillugu inatsisissatut siunnersuut saqqummiussisoqassanngitsoq Naalakkersuisut aalajangertut.
Ilanngaassivimmi akiliisitseriaaseq atorniarneqartoq taassaavoq, innuttaasut inissianut pisortanullu akiitsoqartut akissarsiaasa tunniunneqarnissaat sioqqullugit ilanngaaffigineqartarnissaat.
AAMMA ATUARUK Aningaasarsiatit tigutinnagit ilanngaassivikkoortalissapput
Pisortanut akiitsunik akilersuinermi periuserineqarniartup siunertaraa, pisortanut akiitsut annikillisinneqarnissaat. Akilersueriaaserlu atorniarneqartoq arlalinnit isornartorsiorneqarpoq, ilaatigut sulisitsisut peqatigiiffiannit GE-mit Sulisartut Kattuffiannit SIK-mit, Demokraatinit aamma Atassutip inuusuttaannit.
Ilanngaassivimmi akiliisitseriaatsip atuutilersinneqarnissaa kingusinnerusukkut aatsaat piviusunngussaaq. Inatsisissatut siunnersuut Naalakkersuisut kinguartippaat misissuinerit piareersarnerillu arlaqartut suliarineqartussaammata.
AAMMA ATUARUK Ilanngaassivik akiligassanittartunuinnaq atuutissaaq
Naalakkersuisut isumaqarput suleriaasissat erseqqinnerusumik paasiniarneqaqqaarnissaat utaqqineqaqqaassasoq, tamakku akiliisitseriaatsip aallartinneraniilli siunertarisatut ingerlanissaanik qulakkeerinninnissamut pisariaqarmata.
Naalakkersuisuttaaq isumaqarput, Ilanngaassivik pillugu inatsisissatut siunnersuutip saqqummiunneqannginnerani sivisunerusumik sukumiinerusumillu paasisitsiniaasoqarnissaa pisariaqartoq.
Naatsorsuutigineqarpoq, inatsisissatut siunnersuut kingusinnerusukkut ataatsimiinnissami saqqummiunneqarsinnaassasoq.
AAMMA ATUARUK Ilanngaassivik er ikke en god løsning
Siusinnerpaamik ukiakkut 2018-imi saqqummiunneqarsinnaassaaq. Naalakkersuisut Inatsisartullu Ilanngaassivik pillugu siunnersuummik akuersissappata, tamanna siusinnerpaamik 2019 aallarnerfigalugu atuutilersinnaassalluni.
Taamanikkornissaanullu pisortanut akiitsut naapertuutinngitsumik amerlasuut annikillisarnissaat pillugit suliniutinik allanik Naalakkersuisut isumaliutersuuteqarlutillu periarfissaappat atuutilersitsisassasut, Aningaasaqarnermut Akileraartarnermullu Naalakkersuisoq Aqqaluaq B. Egede tusagassiuutinut nalunaaruteqarluni taama allappoq.
AAMMA ATUARUK Kia qaammammut 3.000 koruunit inuussutigisinnaavai?
AAMMA ATUARUK IT-kkut suliniutit ajutoorsinnaapput