Professori: IT-kkut suliniutit ajutoorsinnaapput
Professori qarasaasiatigut suliniutinik ajutoorsimasunik ilisimasaqartoq taama mianersoqqussuteqarpoq.
- Ajortoorsinnaasorpassuaqarpoq. Kikkulli IT-kkut atortorissaarut atortussaaneraat paasissallugu pingaarpoq, Københavnimi IT pillugu universitetimi professori Søren Lauesen oqarpoq.
Ilanngaassivik atuutilissappat, sulisitsisut sulisumik akissarsiaat pisortat kontoannut ikisassavaat, aningaasalli sulisut kontoinut ikineqannginnerini ineqarnermut, innaallagissamut, kiassarnermut paaqqinnittarfinnullu akiligassat ilanngaatigineqaqqaartassapput.
AAMMA ATUARUK Din løn skal indbetales i offentligt system
Atuisussat peqataatinneqassasut
IT-kkullu atortorissaarut atuisussat tamarmik aallaqqaataaniilli peqataatinneqanngippata ajutuuittoqarsinnaasoq, professori isumaqarpoq.
- Tassalu IT-kkut atortorissaarummik atuisussanit atorneqarsinnaanngitsunik atuutilersitsisoqarsinnaavoq, qanoq atorneqarnissaa nalornissutigineqanngikkuni pisariuallaarsinnaalluni, Søren Lauesen oqarpoq.
Danmarkimi innuttaasut naalagaaffimmut, kommuninut oqartussanullu allanut akiitsuinik akiliisitsinissaq IT-kkut aaqqissuussamit ajornannginnerulersinneqartussaanikuugaluarpoq. IT-kkulli aaqqissuussaq EFI-mik taaneqartartoq mamianartuliarujussuanngorpoq.
Taannalu Danmarkimi akileraarutinut, biilinik inissiinermut akitsuutinut, sukkalisaarpallaarnermut akiligassanut, momsimut licensinullu akiligassani 100 milliardiusuni 80 milliardit koruunit annaaneqarsinnaasut, suliffeqarfissuarmit kukkunersiuinermik suliaqarfiusumit, PwC-mit, nalunaarusiap ersersippaa.
- Taanna Danmarkip oqaluttuarisaanerani IT-kkut ajutoornerni annerpaat ilaanniippoq, Søren Lauesen oqarpoq.
AAMMA ATUARUK Danskit pisortanut 83 milliardit pallillugit akiitsoqartut
Ajortoornerit ilinniutaasussaasut
Professorilu naapertorlugu piareersarluaqqaarnani atuutilersitsineq qanoq ajutoorutaatigisinnaanersoq Danmarkimi pisup takutippaa.
Aaqqissuussap EFI-p atuutilersinneqannginnerani akiliisitsiniartarnermi atorneqarsinnaanera inatsisinik unioqqutitsinerussanersoq misissorneqarsimanngilarluunniit.
- Taava atuutilereernerani oqartoqarpoq, arraa, akissarsianik taama tigumminninnissaq inerteqqutaavoq. Taava uivertoqalerpoq, Søren Lauesen oqarpoq.
Taannalu naapertorlugu, kukkuneq suliap aatsaat naammassilernerani naammattoorneqarpat, iluarsinissaa akisusinnaavoq.
Allatullu ajornavippat IT-kkut atortorissaarut atorniarneqaraluartoq taamaatiinnarneqarsinnaavoq, aallaqqaataaniillu suliareqqinneqartariaqalerluni. Soorlu Danmarkimi Skat taamaasisariaqarsimasoq.
Taamaammat Søren Lauesen Namminersorlutik Oqartussanut siunnersuuteqarpoq.
- Tassalu qarasaasiatigut nalunaarsuinermi akiliisitsisarnermilu suna ajortoorutaasimanersoq pillugu nalunaarusiamma atuarnissaa, Københavnimi IT-nut universitetimi professori Søren Lauesen oqarpoq.
