Sulisitsisut Peqatigiiffiat: Ilanngaassivik iluaqutaanavianngilaq
- Akiitsullit amerlasuut ima aningaasarsiakitsigipput, allaat akiligassanut angummassinnaanatik, Sulisitsisut Peqatigiiffianni pisortaq, Brian Buus Pedersen, oqarpoq.
Innuttaasut pisortanut akiitsullit 60 procentii 100.000 koruunit ataallugit ukiumut akissarsiaqarput, 25 procentiilu 100.000-200.000-illu akornanni ukiumut akissarsiaqartut, Sulisitsisut Namminersorlutik Oqartussanut tusarniaanermi akissuteqarlutik erseqqissaatigaat.
- Taamaammat aaqqissuussaq iluaqutaanavianngilaq.
Innuttaasut pisortanut akiitsui akilinngitsoorneqarsimasut maannakkut 930 millionit koruunit missaanniipput.
Taakkunannga 78 millionit koruunit Namminersorlutik Oqartussat inissiaataannut, soorlu A/S INImut Iseritsimullu, akilinngitsuukkat ilaapput.
AAMMA ATUARUK Aningaasarsiatit tigutinnagit ilanngaassivikkoortalissapput
Aningaasarsialli tigutinnagit akissarsiat Ilanngaassivikkoortinneqartalissasut, Naalakkersuisut siunniuppaat. Soorlu ineqarnermut akiligassat Ilanngaassivikkut ilanngarneqareeraangata, akissarsiat kontomut aatsaat nakkartinneqartalissapput.
Sulisitsisulli Peqatigiiffiat siunnersuummut ilaliinngillat.
Taarsiullugu Danmarkimi inissiaatileqatigiiffinni misilittakkat isumassarsiorfigisinnaasut, taakku isumaqarput. Inissiaatileqatigiiffiit ineqartunut akiliinngitsoortartunut ornigullutik siunnersuiartortartut, GE-mi pisortap oqaluttuaraa:
- Isumaqarpunga misilittakkat taakkua atorluarneqartariaqartut, aamma Kalaallit Nunaanni. Qularinngilara akiitsulinnut siunnersuilluarneq pitsaasumik sunniuteqarluarsinnaasoq.
Meeqqanut akilersuisut 360 millionit koruuninik pisortanut akiitsoqarput. Taakkualu immikkut sammineqarnerusariaqartut, pisortaq isumaqarpoq.
Innuttaasut pisortanut akiitsui akilinngitsoorneqarsimasut ukioq kingulleq 875 millionit koruuniusut maannamut 930 millionit koruuniupput.
Taamaammat Naalakkersuisut aaqqiissutissamik ujartuinerat pitsaasoq, pisortaq oqarpoq.
- Iliuuseqarniarnerat pitsaasutut isigaara Inatsisillu siunertaa aamma isumaqatigaarput. Tamannali anguniakkatut sunniuteqanngitsoorsinnaanera aarleqqutigaarput, GE-mi pisortaq, Brian Buus Pedersen, oqarpoq.
