Naalakkersuisut naalagaaffeqatigiinnit partiinut tapiissutit atorunnaarsinneqarnissaannik siunnersuuteqaqquneqartut

Pele Brobergip (N) naalakkersuisut partiinut tapiissutit Danmarkimeersut Savalimmiuneersullu inerteqqutaalersinniarlugit ukiaanerani ataatsimiinnissami tulliuttumi inatsisissatut siunnersuuteqartikkusuppai.

Politikerit Inatsisartunut siorna qinersisoqarnissaa sioqqullugu nunanit allanit tapiissutisisarneq inerteqqutigilerpaat.

Partiit tamarmik, Naleraq kisiat pinnagu, Danmark inerteqqummut ilanngunneqarnissaa akuerinngilaat.

Pele Brobergip siunnersuutaa Inatsisartuni pingasunngornermi taasissutigineqarpoq. Partiit tamarmik siunnersuut taasinermikkut tapersersorpaat.

Taamaattumik naalakkersuisut oqaatsip 'tapiissut' qanoq paasisariaanera pillugu erseqqissaanissaannik peqquneqarput.

Inatsisartut oqaaseq allatigut aamma tapiissutinut, assersuutigalugu ikiuutinut, pequtinut, akimik appaanermut assigisaannilluunniit partiimut ilaasortamulluunniit naleqarsinnaasumut tunngasinnaanersoq misissoqquaat.

Naatsorsuutigineqanngitsumilli siullermik oqallittoqalerpoq, tamannalu ataatsimiittarfimmi paatsiveerutsitsivoq.

Nakkutilliisoqarnerulissasoq

Pipaluk Lynge (IA) oqalugiaqqaarpoq.

Taanna partiini sinnerlugu siunnersuummi Danmark Savalimmiullu kisiisa pineqarnerarlugit USA-lu ilaannginnerarlugu isornartorsiuivoq.

Naleqqamiilli naalakkersuisullu siulittaasuannit Jens-Frederik Nielsenimit (D) kingusinnerusukkut naqqinneqarpoq.

- Naalakkersuisunit tamanna qanoq paasisimaneripput erseqqissarusuppara. Nunanit allanit tapiissuteqartoqarsinnaajunnaareerpoq. Siunnersuut una partiinut maani nunami najugaqanngitsunut ilassutitut siunnersuutaavoq, Jens-Frederik Nielsen oqarpoq.

Pipaluk Lyngep (IA) nuna tamakkerlugu qinikkat, aamma kommunini najukkanilu politikerit, sunnerniarneqarnerannik nakkutilliinerusoqarnissaa IA sinnerlugu kissaatigaa. Assi © : Malik Brøns / KNR

Taakkua USA-mit tapiissutit Inatsisartunut qinersisoqarnissaa sioqqullugu inerteqqutaalernerat malugeqquaat. Taamaalilluni ullormut siunnersuut inatsisinut atuuttunut ilassutitut isigineqassalluni.

Pipaluk Lyngep politikerit nunanit allanit sunniiniartunit oqaloqatigineqartartut attaveqarfigineqartartullu nakkutigineqarluarnerusariaqarnerat tamatuma kingorna innersuussutigaa.

Tamanna toqqaannartumik oqaatigineqanngilaq, Reutersilli allaaserisaanut Amerikamiup Drew Hornip, ilaatigut Pele Brobergimik, oqaloqateqartarsimanini tunngavigalugu præsidentip illorsuanut nalunaarusiortoqartarsimaneranut innersuussutaasinnaavoq.

Pipaluk Lyngep inatsit partiinut toqqaannanngitsumik tapersersuinermut, soorlu inoqatinut attaveqaqatigiittarfikkut kinaassusersiortunut kiisalu bitcoins aqqutigalugit tapersersuinermut aamma atuussinnaanersoq misissoqquaa.  

Kommunini najukkamilu politikerit taakkualu partiinut nunanit allaneersunut attaveqarnerat sunnerniarneqarsinnaanerallu aamma nakkutiginerusariaqartoq naggataatigut erseqqissarpaa.

Inatsisartulli siulittaasuat Kim Kielsen (attaviitsoq) oqallinneq nutaaq pilersinneqaqqunagu mianersoqqusivoq.

Politikerillu Pele Brobergip siunnersuutaa inatsisinillu ataatsimiititaliap oqaaseqaatai kisiisa taasissutiginiartussaavaat.

Oqallinneq puullaaqissutaasoq

Oqallinnerup siunnersuutigineqartunit allamut sangutinniarneqartarnerat aatsaat pilinngilaq.

Naleraq toqqaannanngikkaluartumillu Kuno Fencker (N), siunnersuut politikerinit oqallisigineqaqqaarmat pasinninnerit imaaginnavipput. 

Tamanna taassumap USA-mut  2024-mi angalanikuuneranut, tusagassiuutip Frihedsbrevet-ip allaaserinninnera naapertorlugu, politikkimik sammisaqarnissamut aaqqissuussinernut bilitsinik koruunit tusindilippassuit nalingannut tunineqarsimaneranut tunngavoq.

Inatsisartut siulittaasuata siunnersuut, naak aappassaaneerneqareeraluarluni, Inatsisinut Ataatsimiititaliamut utertinneqassasoq ataatsimiittarfimmiittunut apeqqutigaa. Siunnersuut ataatsimiititaliamit suliarineqareermat  taasissutigineqartussanngormallu tamanna puullaaqisitsivoq.   Assi © : KNR / Malik Brøns

Inatsisartut siulittaasuata siunnersuut, naak aappassaaneerneqareeraluarluni, Inatsisinut Ataatsimiititaliamut utertinneqassasoq ataatsimiittarfimmiittunut apeqqutigimmagu, puullaaqisoqaqaaq.  

Tamanna pissutigalugu inuit arlallit, ilaatigut Aqqalu C. Jerimiassen (A), suna taasissutigineqartoq apeqquserpaat:

- Nalornivunga. Ataatsimiititaliamimi siunnersuut tapersersorlugu isumaqatigiittoqarpoq. Ilissi (IA, aaqq.) taamatut oqariartuuteqarassi akuerissanerlugu akerlerissanerluguluunniit nalornivunga. Siunnersuut ataatsimiititaliamut utertinneqassanersoq, arlaataluunniit siulittaasumut akissuteqarfiginngilaa.

- Siunissami sumik kissaateqarpisi?

Kim Kielsen oqaaseqaqqippoq erseqqissaatigalugulu, Pele Brobergip siunnersuutaa partiinit akuerineqarpat, taava 'tapiissuteqartarneq' pillugu nassuiaat ilaneqassasoq Danmarkillu Savalimmiullu saniatigut nunanut allanut aamma atuutissasoq.

Brobergip partiit qutsavigigai  

Pele Broberg oqaluttarfimmi taasinissaq sioqqullugu kingullersaalluni oqaaseqarpoq.

Partiit tapersersuinerannut qutsavigai Pipaluk Lyngellu kommunini sunniiniarnernut mianersornissaq pillugu isumaliutersuutaa tapersersornerarlugu.

- Oqallinnermi sammineqartut pissanganartut tassaapput kommunalbestyrelsimi najukkamilu ataatsimiititaliani sunniiniartoqannginnissaa qanoq qulakkeersinnaaneripput. Naalakkersuisunit tamakkua aamma isiginiarneqarnerat qularinngilara, taanna oqarpoq.