Tusagassiuut: Amerikamiu politikerinik inussutissarsiortunillu oqaloqateqarnini tunngavigalugu præsidentip illorsuanut paasissutissiisoq

Erseqqissaaneq: KNR Pele Brobergip saaffiginninnerata kingorna allaaserisaq erseqqissarniarlugu aalajangerpoq. Pele Broberg præsidentip illorsuanut paasissutissiisutut allaaserisami siullermik saqqummiunneqarpoq. Reutersilli allaaserisaani politikkikkut inuussutissarsiornermiillu paasissutissat allaaserineqarnerat, Pele Brobergillu oqaloqatigineqartarsimanera allaaserineqarsimasoq, Pele Brobergili kisimi pineqanngitsoq Pele Broberg KNR-imut oqarpoq.

Amerikamiut pingasut, aqqi oqaatigineqanngitsut, Kalaallit Nunaanni  isertortumik sunniiniarsimanerat DR-imit siorna allaaserineqarpoq.

Angutit taakkua ilagaat niuertoq Drew Horn.

Reutersimi allaaserisami taanna  Kalaallit Nunaanni politikkikkut inuussutissarsiornikkullu pissutsit pillugit nalunaarusianik sukumiisumik imalinnik præsidentip illorsuanut nassiussisarsimalluni oqaluttuarpoq.

- Nalunaarusiat taakkua ilai Pele Brobergimik (N) oqaloqateqarnermigut paasissutissarsineranik tunngaveqartut, Drew Horn Reutersimut oqarpoq.

Pele Brobergip Drew Hornip Kalaallit Nunaanni sunniuteqarniarnera Reutersimut nammineq ilumuunnginnerarpaa.

Aammattaaq Naleqqap nunatta ilamerngaluunniit præsident Donald Trumpimut minnerpaamilluunniit tunniunnavianngikkaa oqarpoq.

Reuters allappoq Drew Hornillu præsidentip illorsuani oqaloqatigisartagai sulisut nalinginnaasuunngillat, Reuters allappoq.

Aamma USA-p nunanut allanut ministeria Marco Rubio, tusakkat naapertorlugit, toqqaannartumik attaveqarfigaagooq.

Ministerit emaileqatigisarai

Reutersip Drew Hornip  Bent Olsvig Jensen, Lumina Sustainable Mineralsimi pisortaasoq, siorna ataatsimeeqatigigaa allaaseraa.

Amerikamiup ingerlatseqatigiiffimmut aningaasaliinissamik soqutiginninnini ataatsimiinnermi ersersippaa, Bent Olsvig Jensenili akuersiumanngilaq.

Ataatsimiinnerup arlaleriarluni unitsinneqartarnera tamatumunnga ilaatigut pissutaavoq.

Drew Horn USA-mi niuernermut ministerip Howard Lutnickip nunanullu allanut tunngasunut ministerip Marco Rubiop e-mailii akisariaqarnerarsimavai.

- Kina oqaloqatigineripput erseqqittariaqarpoq - pisuusaartuussanngilaq, Bent Olsvig Jensen Reutersimut oqarpoq.

Reutersip Drew Horn oqaloqatigigamiuk, taanna taama oqarsimannginnerarpoq ministerinillu taakkunannga e-mailinik tigusaqarsimannginnerarluni.

Oqaluttuani allanngortikkaa

Pele Broberg Drew Horn  tusagassiortumik danskimik nereqateqarnermini ataasiaannarluni ataatsimeeqatiginerarlugu Reutersimut aallaqqaammut oqaluttuarpoq, aqqusinermilu naapittarsimanerarlugu.

Drew Hornip Pele Broberg nammineq ikinngutimisut eqqaavaa, ilaannikkullu nereqatigiutigalugu Kalaallit Nunaata USA-llu soqutigisaat qanoq siuarsarneqarsinnaaneranik oqaloqatigisartagarinerarlugu.

Reutersillu Drew Horn Pele Brobergilu ilaquttatik peqatigalugit Qooqquni ulloqeqasioqatigiinneranit assilisanik pissarsivoq.

Reutersilli assit Pele Brobergimut takutimmagit, Pele Brobergip Drew Horn ullormut angalaaqatigisimallugu tusagassiuummut oqaluttuarpoq.