Nunanut allanut ataatsimiititaliaq kilitsissiatut suliaqartoqarsinnaanera pillugu suliamut maanna oqaaseqartoq
Nunanut allanut sillimaniarnermullu ataatsimiititaliami siulittaasut kilitsissiatut suliaqartoqarsinnaanera amerikamiullu sinniisoqarfiata matuneqaratarsinnaanera assigiinngitsunik isumaqarfigaat.
Ataatsimiititaliami siulittaasup, Pipaluk Lyngep (IA) amerikamiut sinniisoqarfiata matuneqarnissaanik oqallisiginninnissaq ammaffigigaa KNR-imit ippassaq oqaatigineqarpoq.
Tusagassiorfiup, Wall Street Journalip Præsident Trumpip amerikamiut isertortumik paasiniaasartuini pisortat Kalaallit Nunaanni paasissutissanik katersinermik annertusaanissaannik peqqussuteqarfigisimagai saqqummiummatigit taama nalunaaruteqartoqarpoq. Tamannami pissutigalugu arlallit USA-mit kilitsissiatut suliaqartoqarsinnaanera ernumassutigilerpaat.
Ataatsimiititalialimi siulittaasup tullersortaata, Pele Brobergip (N) USA-mit kilitsissiatut suliaqartoqaratarsinnaanera pillugu pissutsinik oqallisiginninnissamut soqutiginnigani sisamanngornermi oqaatigaa. Taassuma danskit sunniuteqarnerat nunatsinnilu kilitsissiatut suliaqarnerat ukkatarerusunneruaa. PET-ip tassa politiit isertortumik paasiniaasartuisa danskinit nunatsinni kilitsissiatut suliaqartoqanngitsoq DR-imut tallimanngornermi oqaatigaa.
KNR-ip ataatsimiititaliami ilaasortat sinneri suliamut atatillugu qanoq isiginninnerat pillugu oqaloqatigai.
Matusisoqarnissaa taperserneqanngitsoq
Erik Jensenip (S) USa-mik kilitsissiatut suliaqartoqarsinnaanera akuersaarneqarsinnaanngissoraa. Sinniisoqarfimmilli matusisoqarnissaa naleqqutinngissoralugu.
- Sinniisoqarfimmik matusisoqarsinnaanerata oqaluuserineqarnissaa naleqqutinngitsoq isumaqarpugut. Nunarput naalagaaffittut namminersortutut nunanik allanik suleqateqarluni ineriartornissaa kissaatigigutsigu matusisoqarnissaanik oqalunneq tassunga assortuissaaq. Kilitsissiatulli suliaqartoqarnera oqaluuserineqartoq misissuilluaqqissaarfigineqarlunilu tutsuiginartuussaaq, tunngavilersukkamimmi eqqortumillu oqallinnissaq pingaaruteqarpoq.
Suliaq innuttaasut isumannaatsuunissaannut tunngassuteqarmat ernumanartuusoq, Nivi Rosing (IA) oqarpoq. Taamatullu IA-mit Pipaluk Lyngep sinniisoqarfiup kilitsissiatullu suliaqartoqaratarsinnaanerata ammasumik oqaluuserineqarnissaat neriuutigaa.
- Kilitsissiatut suliaqartoqarsinnaanerata oqaluuserineqarnera pillugu tupallungalu ernumavunga. Qinikkat peqqissaartumik oqaluuserinninnissaat pingaaruteqarpoq. Taamaammat innuttaasut ilanngutitinneqartariaqartut aamma isumaqarpunga.
Justus Hansen (D) Nivi Rosingip isumaata muminganik isumaqarluni matusisoqarnissaata isumaliutigineqarlualernissaaniinngitsugut isumaqarpoq.
- Oqaloqatigiinnerup ingerlateqqillugu sinniisoqarfimmi matusinissaq pinnagu suleqatigiinnermik ineriartortitsilluarnissarput oqaloqatigiissutigisigu. Periarfissat matusinnginnermit suleqatigiissutigisinnaasagut ammaffigissavagut, taanna oqarpoq.
USA-p nunanut allanut ministerianik ataatsimeeqatiginninneq
Atassutip siulittaasuata, Aqqalu Jerimiassenip sinniisoqarfimmik matusinissaq kingullertut periarfissaassasoq oqaatigaa – periarfissarlu taanna suli atorneqartussaanngilaq.
- USA iligisaraarput, toqqaannartumillu matusinissamik sioorasaaruteqarata qanoq aaqqiissuteqarnissarput pillugu pitsaasumik oqaloqatigiissaagut.
Aammattaaq amerikamiut nunanut allanut ministereqarfiannik nunanullu allanut ministerip, Marco Rubiop ikinngutiginnippalaartumik oqaloqatigiissutigineqarnissaa periarfissaasinnaasoq oqaatigaa.
- Akuersaarneqarsinnaanngilluinnarpoq, taamaammat immitsinnut kilitsissiatut suliaqarfiginata USA-p nunanut allanut ministeri pitsaasumik oqaloqatigissavarput.
