Podcast nutaaq imminut toqunnermut tunngasoq
Podcastiliaq nangeqattaartoq nutaaq Inuuneq annernaraangat aqqutigalugu, sammisaq oqimaatsoq pillugu oqaloqatigiinneq ammaanniarneqarpoq, sammisarlu pillugu paasinninnerunissaq anguniarneqarluni.
Allattoq Aminnguaq Dahl Petrussen
apriilip 23-at 2026 10:51
Podcastiliaq nangeqattaartoq nutaaq Inuuneq annernaraangat aqqutigalugu, sammisaq oqimaatsoq pillugu oqaloqatigiinneq ammaanniarneqarpoq, sammisarlu pillugu paasinninnerunissaq anguniarneqarluni.
Podcasti atuakkiortumit Niviaq Korneliussenimit pilersitaavoq, imminullu toquttarneq assigiinngitsunik sammivilerlugu sammivaa. Inuit qanigisaminnik annaasaqarsimasut, aliasuutillit misilittagallillu oqaluttuaat tusarnaarneqarsinnaapput. Aammali ilisimatusarsimasut, ilaatigut oqaluttuarisaanermut inuiaqatigiinnullu tunngasunik paasissutissaatillit, psykologit psykiaterillu siunnersuuteqartarlutik qanoq imminut toqunnissamik oqaloqatigiinneq ingerlanneqarsinnaanersoq aamma qanoq inuit ajornartorsiortut ikiorneqarsinnaanersut pillugit oqaluttuarnerit tusarnaagassiani tusarnaarneqarsinnaapput.
Podcastimi aamma systemi isornartorsiorneqarpoq. Podcasti naapertorlugu inuit amerlavallaat pisariaqartitaminnik ikiorneqarneq ajorput, pingaartumik ajornartoornermi inuunermilu ulorianartorsiortoqartillugu. Podcastip siunertarinngilaa ajornartorsiutinut ajornanngitsunik aaqqiissutissanik tunniussineq, kisianni nipangiussinnginnissaq pilersikkumaneqarpoq. Kissaatigineqarpoq imminut toqunnissamik eqqarsaatit imaluunniit aliasunneq pillugit kisimiinnginnerulersitsinissaq, kiisalu oqaloqatigiinneq ammaanniarneqarluni.
Suliniut Lions Club Nuukimit taperserneqarpoq. Klubip siulittaasua, Mads Reimer Andersenip oqarnera naapertorlugu tapersiineq naleqquttuuvoq, tassami imminut toqunnissamut pinaveersaartitsineq klubip pingaarnertut sammisaqarfigimmagu.
– Kalaallit Nunaanni inuit amerlavallaat imminut toqunneq qanigisaminni misigisimavaat. Kissaatigaarput ammanerusumik oqaloqatigiinneq ilisimasaqarnerlu annertunerulersinneqassasut, taamaalillutik amerlanerusut ilisimasinnaassavaat ersiutit suunersut aammalu piffissaagallartillugu ikiuinissaq. Ataasiinnaalluunniit inuuneq toqqarpagu, tamanna allannguutaassaaq, oqarpoq.
Podcastit immikkoortut aqqaneq marluk KNR Radiokkut sapaatit akunnerini tulliuttuni sisamanngornermi nal. 13.00 aallakaatinneqartassapput, kiisalu knr.gl-imi tusarnaarneqarsinnaallutik.
Ajornartorsiuteqarlutit imaluunniit imminut toqunnissamik eqqarsaatit pigigukkit, pingaaruteqarpoq oqaloqatiginnissinnaasumik attaveqarnissat.
Tusaannga attavigiuk: Oqarasuaat 801180, SMS 1899 imaluunniit Tusaannga.gl.
Tusaannga attavigiuk: Oqarasuaat 801180, SMS 1899 imaluunniit Tusaannga.gl.
