Kalaallit aalisartut qallunaatulli pisinnaatitaaffeqalernissaat qanillivoq

Imarsiortut aalisartullu pilluaqquneqangaarput, Inatsisartut kalaallit umiarsuaataanni inuttat pisinnaatitaaffeqalernissaat pillugit siunnersuummik nutaamik pingasunngornermi oqaluuserinnimmata.

Kalaallit aalisartut umiarsuarniqallunaat erfalasuannik atuisuni, siunnersuut naapertorlugu, taakku inuttaasa pisinnaatitaaffiinik siunissami pisinnaatitaalissapput. 

– Aalisartut sulinerminni atugaasa pitsanngorsarneqarnissaannut isumaqatigiittoqarnera nuannaarutigaara, Ineqarnermut, Angallannermut, Attaveqaqatigiinnermut, Nunaqarfiit Isorliunerusullu Upalungaarsimanermullu Naalakkersuisoq nutaaq, Iddimanngiiu Jensen Bianco (IA), oqaluttarfimmit taama oqarpoq.

Siunnersuut aappassaanneerneqartup kingunerissavaa aalisartut imarsiortullu atorfininnerminnut isumaqatigiissumik siunissami ilaatigut atsiortalissammata, nakorsamik ajornannginnerusumik ikiorneqartalersinnaassallutik, toqqissillutillu angerlarsinnaassaallutik. 

Sivisuumik  piareersarneqarpoq

Ineqarnermut, Attaveqaqatigiinnermut, Inatsisit Atuutsinneqarnerannut Naligiissitaanermullu 2021-mi Naalakkersuisuusoq noqqaassuteqarpoq Danmarkimi inuussutissarsiornermut ministeri pilersaarummik suliakkerneqassasoq, misissorneqassalluni kalaallit imarsiortut sulinerminni atugaat qanoq ilillugit pitsaaninngortinneqarsinnaassasut. 

Suliakkiissutigineqartup sivisuneranut imarsiortunut atorfinitsitsisarnermut tunngasoq nunatsinnit oqartussaaffigineqarnersoq oqartussaaffigineqannginnersorluunniit isumaqatigiinngissutaanera pissutaavoq.

Isumaqatigiinngissutaasoq maannakkut isumaqatigiissutaareerpoq suliarineqareerlunilu Danmarkimi inatsisaasoq nunatsinni naalagaaffeqatigiinneq tunngavigalugu atuuttussanngortinneqarluni. Taamaalillutik kalaallit aalisartut imarsiortullu qallunaatulli pisinnaatitaaffeqalissallutik.

- Suliassaq tamanna ukiuni arlalinni aamma aalisarnermut naalakkersuisuunerma nalaani sammisarparput, massakkut inerneqarmat nuannaarutigeqaara, Ane Hansen (IA) oqarpoq.

Inatsisip nutaap aamma pisinnaatitaaffiit ilassutaasut malinneqarnissaat Imarsiornermik qullersaqarfiup nakkutigisarissavaa.

Isumaqatigiilluinnarneq

Inuussutissarsiutini annerpaami sulisut pisinnaatitaaffiisa pitsanngorsarneqarnissaat pillugu isumaqatigiinneq ersarimmat, Inatsisartuni oqallinnermik pilersitsisoqanngilaq.

Ilaasortat 26-t najuuttut tamarmik inatsisissamut nutaamut taaseqataapput.

– Naleqqap soorunami siunnersuummut matumuna tapersiivoq, Kuno Fencker (N) oqarpoq nangillunilu: 

– Nunatsinni imarsiortut eqqarsaatigigaanni, taakku  inatsisitigut maannakkut aatsaat illersorneqarsinnaalerput.

Inatsisip nutaap aalisartut atugaasa pitsanngorsarneqarnissaannut aqqutissiuussissasoq, Erik Jensen (S) isumaqarpoq.

- Pisinnaatitaaffiit tamakkiisumik atorneqarnissaat neriuutigaarput, taanna oqarpoq.

Siunnersuut aatsaat pingajussaaneerneqareerpat inaarutaasumik akuersissutigineqassaaq. Siunnersuut qaqugu pingajussaaneerneqarumaarnersoq allaqqanngilaq.