Assammik arsarneq: Anngunniunnerit ajornakusoortut kalaallit peqataaffigilerpaat
Angutit assammik arsarnermi nunanut allanut unammisartut qanittukkut Danmarkiliassapput USA-mi VM-imut kinnguninngua anngunniukkiassallutik. Iligiit tallimat anngunniuteqataassapput iligiillu ataasiinnaat Tysklandimi aappagu VM-ertoqarnissaanut anngussinnaallutik.
Amerikap avannaamiut Caribiamiullu VM-imut USA-mi anngunniunnerat maajip aqqarnganni aallartissaaq peqataasoralugit Kalaallit Nunaat, Canada, Den Dominikanske Republik, Mexico aamma USA.
- Kingullermik USA unammigatsigu inuusoqisunik arsartoqarput. USA Danmarkimut Royal Arenami qaammat kingulleq unammisoq takuarput. Angisuujupput siornatigut unammisimasatsinniit allaanerullutik, angutit assammik arsarnermi nuna tamakkerlugu sungiusaasuat Johannes Groth KNR-imut oqarpoq.
OL-imut piareersarput
Kalaallit maanna unamminissaanni USA sakkortunerussamaalerpoq.
- Unammisartui pikkorinnerni ligami nunani soorlu Islandimi, Danmarkimi, Tysklandimi Ungarnimilu unammisartuupput. Taamaattumik oqartariaqarpugut USA unamminerni ajugaassangatinneqartoq. Soorunami assammik arsarnermi qanorluunniit pisoqartarpoq. Taamaattumik periarfissavut tamaasa atorniarsariumaarpagut, Johannes Groth oqarpoq.
USA nunanut allanut unammisartunik sakkortuunik ukiuni kingullerni pilersitsivoq arsartut nunanit tamalaaneersut katersorlugit. USA-mi 2028-p aasaanerani olympiadertoqassaaq, taamanikkornissaanullu unammisartut sakkortuut piareersarneqarput.
Kalaallit nunanut allanut unammisartut piareersarnissamut atugassarisaat siornagumut sanilliullugit pitsaanerulerput. Nunanut allanut unammisartut VM-imut anngunniunnerit akorngini ukiorpassuarni unammineq ajorput. Angutit nunanut allanut unammisartut siorna oktobarip naanerani Islandimiipput aamma Parisimi ukioq januarimi sungiusarlutillu unammillutik.
- Anngunniunnissami arsartussanik toqqaanermi sungiusaqatigiissimanerit najoqqutaraagut. Soorunami aamma Nunatsinni pissartanngorniunnermi arsartut malinnaaffigeqqissaarpagut. Ukiorli ilivitsoq takutinneqartut najoqqutarinerullugit toqqaavugut, Johannes Groth oqarpoq.
- Siullermik Danmarkiliassaagut sungiusarlutalu sungiusaammik unammilluta. Aamma siusissukkut USA-liarpugut unammerit sioqqullugit arsartut avatangiiserisatik sungiutereerniassammatigit, Johannes Groth oqarpoq.
VM-imut anngunniunnermi kalaallit unamminissaasa KNR-TV-imi takutinnissaat sulissutigineqarpoq.
