Inuit sisamat Danmarkimi qimuttuitsunik ajutoortoqarnerata kingorna peruluttut
Qimuttuitsut Danmarkimi Sjællandip avannaani Gribskovbanenimi sisamanngornermi ullaakkut ajutoorput.
Inuit sisamat perulullutik napparsimmavimmi uninngasut, ajutoornermullu atatillugu inuit katillugit 17-it ajoqusersimasut, Region Hovedstaden Ritzauimut ilisimatitsivoq.
Politiit annaassiniartartullu amerlasuut pisumut orniguttut, politiit sillimasuisa pisortaat Lee Skeen Ritzauimut oqarpoq.
- Kagerupimi qimuttuitsut ajutoorfianniippugut. Pisimasoq misissorparput, nalunaaruteqartuarumaarpugullu, pigaartut pisortaat oqarpoq.
Sjællandip avannaani politiini sillimasup qimuttuitsut marluk aporsimanerat nittartakkakkut Politi Updatekkut nalunaarutigaa.
Illoqarfiit pingaarnersaanni upalungaarsimasut Frederiksborgimilu qatserisartut annaassiniartartullu sinnerlugit, X-imi aamma taama allapput.
- Qimuttuitsut marluk aporput. Ajutoorfimmut ikiuisussat amerlasuut ornigupput. Ilaasut tamarmik qimuttuitsunit niusinneqareersut ajoqusertoqarsimaneralu nalunaarutigineqarpoq, X-imi allataat ilaatigut taama imaqarpoq.
Borgmesteri aalassaqqaqisoq
Illoqarfiit pingaarnersaanni upalungaarsimanermut pisortaqarfik kingusinnerusukkut nalunaarpoq, ajoqusersimasut tamarmik qimagunneqarsimasut, ilaasullu sinneri aatiffissamut inissinneqartut.
Frederiksborgimi qatserisartut annaassiniartartullu ajutoortoqarneranik sisamanngornermi ullaakkut nalunaaqutaq 06.30 kalerrinneqarput, tamannalu Beredskabsstyrelsenip upalungaarsimasunut nalunaarutinik internetikkut nalunaarsuinerani takuneqarsinnaavoq.
Gribskovimi borgmesterip Trine Egetvedip (K) ajutoortoqarnera Facebookikkut oqaaseqarfigaa.
- Aalassaqqaqaanga tupaqqaqalungalu aamma pineqartut tamaasa eqqarsaatigaakka. Qimuttuitsortarfik 'Lokalbanen' Gribskovimi innuttaasunit, sulisunit atuartunillu amerlasuunit atorneqartarpoq, borgmesteri ilaatigut oqarpoq.
- Upalungaarsimasut ulapputeqaqalutik sulipput, qanorlu pisoqarsimanera paasiniarlugu kikkullu tamarmik pisariaqartitaminnik ikiorneqarnissaannik qulakkeerinninniarluta sulivugut, Trine Egetved allappoq.
/ritzau/
