Aasiaat: Borgmesteri tunisassiorfik pillugu oqaaseqartoq

Aasiammiut tunisassiorfiup matuneqannginnissaa anguniarlugu marloriarlutik akerliussutsimik takutitsipput. 

Sulisitsisummi Aasianni immikkoortortaqarfiata oqaluttuarneratut, piaartumik aaqqiissutissarsisoqanngippat kinguneqarujussuassaaq.

KNR-ip Kommune Qeqertalimmi borgmesteri, Simigaq Heilmann (D) apriilip aqqaneq aappaanni apersormagu, taanna aamma ernumanerarpoq.

- Innuttaasut ernumanerat paasisinnaavara. Kommune sinnerlugu uagutsinnullu kinguneqarnissaa eqqarsaatigalugu uanga aamma ernumavunga.

- Kommune suliffeeruttussanut pisussaaffeqarami ernumanarpoq, tamannalu aningaasarpassuarnik naleqartussaavoq. Aammattaaq kommune akileraarutinik annaasaqassaaq, taamaattumik ernumassutissaqarpugut.

Kommune, sulisut 87-it suliffeerutissappata, katillugit 18,4 millionit koruuninik annaasaqassaaq toqqaannanngitsumillu akileraarutinit isertitassanik annaasaqassalluni, borgmesteri ilisimatitsivoq.

- Tamakkuinnaanngillalli. Aasianni inuussutissarsiortut soorunalimi aamma eqqugaassapput. Kommune kisimi eqqugaanavianngilaq; tamatta sutigut tamatigut eqqugaassaagut, borgmesteri oqarpoq. 

Nuuttoqarnerulernissaa ernummatigineqartoq

Sulisitsisut Qeqertarsuup Tunuani immikkoortortaqarfianni siulittaasup Søren Hansenip  Aasiaat, fabrikki matuneqassappat, nutsertorpassuarnit eqqugaaqqinnissaa annilaanngatigalugu KNR-imut oqarpoq.

Aasianni tunisassiorfik 2005-imi kingullermik matummat, inuit 300-t missaanniittut nutserput. Imaappoq innuttaasut 10 procentii.

Borgmesteri aamma taama ernummateqarpoq.

-  Nuuttartut ukiuni kingullerni aamma amerliartuinnarneri ernummatigaara. Kommune Qeqertalik, kommuninut allanut sanilliullugu, innuttaasunit nutsertunit qimanneqarnerpaavoq, taamaattumik taamatut ineriartortoqartuassappat innuttaasullu suli amerlanerusut annaassagutsigit ernummatigaara.

Aasianniit nuuttartut Aasiannut nunasillutik nuuttunit 2020-miit 2025-mut 229-nik amerlanerusut, naatsorsueqqissaartarfiup kisitsisaataannit paasinarsivoq.

Innuttaasut nuunnissaat pinngitsoortinniarlugu ilissi nammineq iliuuseqarpisi?

- Kommunalbestyrelse immikkut ittumik ataatsimiisippagut suleqatigiissitaliorlutalu. Naalakkersuisunik oqaloqateqarnissamut piareersarnikuuvugut.

- Tamanna taamaallaat oqaluuserinianngilarput, kommunitsinnili inissisimaffipput tamakkiisumik isigalugu, naalakkersuisunik ataatsimeeqateqarnitsinni oqaluuseriniarparput. Uagut aamma isorinnippugut akisussaaffimmillu tigusisoqarnissaa kissaatigalutigu.

Naalakkersuisumit akissutiserusuttoq

 Polar Seafoodip pissutsit pillugit kommunimut saqqummiussisimanera, Simigaq Heilmann oqaluttuarpoq. Kommune suleqatigiissitamik oqaloqatigiinnissamik pingaartitsisumik tamatuma kingorna pilersitsivoq.

Borgmesterilli naalakkersuisut akisussaanerpaanerat erseqqissarpaa.

- Taamaattumik iliuuseqartoqarnissaa neriuutigeqaara.

Kommune aalisarnermut naalakkersuisumut Peter Borgimut (D) ataatsimeeqatiserinnilluni saaffiginnissimanera, Simigaq Heilmannip oqaluttuaraa.

Borgmesterilli oqarnera naapertorlugu suli ataatsimiittoqanngilaq.

Kommunip ataatsimiinneq tamanut iluaqutaanissaa anguniarlugu, apeqqutit naalakkersuisumut nassiuppai.

- Qanittukkut naapissinnaagivut neriuutigaara, borgmesteri oqarpoq.

Inuit suliffissaaleqinnginnissaat qanoq ilillutit qulakkeersinnaaviuk?

- Tunisassiorfiup matuneqannginnissaa soorunami pingaarnertut oqariartuutigaarput.

- Inuit imminnut pilersortut illersorniarpagut, taamaattumillu naalakkersuisut tamanna pingaartissagaat nunaqavissullu maaniiginnarnissaat neriuutigaarput.