Naalakkersuisut: KNR peqataatipparput
Naalakkersuisut ammasuunissamik puigugaqarsimanerarlugit KNR-ip allannera eqqortuunngilaq. Naalakkersuisut tusagassiuutinut taama nalunaaruteqarput.
Naak Naalakkersuisut tusagassiuutit angalanissamut qaaqqunngikkaluaraat, angalasoqarnissaanilluunniit siumut ilisimatitseqqaanngikkaluartut, aammalumi timmisartumi inissaqanngikkaluartoq, KNR-ilu angalaqataaguni ataatsimiinnerit ilaannut najuussinnaanngikkaluartoq, Naalakkersuisut oqaatigaat KNR Canadamut angalanissamut atatillugu peqataatinniarneqarsimagaluartoq.
Tassami KNR-ip Canadamut nammineq angalanissaanut, taavalu ataatsimiinnernut Naalakkersuisut akuerisaannut peqataanissaanut, Naalakkersuisut periarfissiipput.
KNR-ili peqataanissamut qaaqquneqanngilaq, angalasoqarnissaali allatigut tusarluni. Taava peqataasoqarsinnaaneranik aningaasartuutissallu ilaannakortumik matussuserneqarsinnaanerannik, KNR oqartussanut saaffiginnissuteqarpoq.
Aamma atuaruk Naalakkersuisut ammasumik pissuseqarnissartik puigoqqippaat
KNR-ip angalanermut peqataasinnaanissaa ajoriffissaqartinngikkitsik, Naalakkersuisut akissuteqarput, erseqqissaallutilli, tusagassiuutit angalanermi peqataasinnaanerat pillugu tikeraartitsisut, tassa Canadamiut, Namminersorlutillu Oqartussat akornanni oqaloqatigineqanngitsoq.
- Tusagassiuutit ataatsimiinnerit ilaannut peqataasinnaannginnerat taamaammat naatsorsuutigineqartariaqarpoq, Naalakkersuisut KNR-ip saaffiginnissutaanut akissumminni ilaatigut allapput.
Timmisartoq ulikkaartoq
Aatsitassarsiorniarnernut atatillugu tusagassiuutit peqataatinneqartarnissaannut Naalakkersuisut siunniussartik taamaasillutik eqquutsinngilaat, soorlu Australiamut siorna angalasoqarneranut atatillugu aamma taamaaliortut.
Aamma atuaruk Qujaukitsoq: Inissaaleqisoqarnera pissutaalluni tusagassiortunik peqataasoqanngilaq
Naalakkersuisut aamma nalunaarutigaat Canadamut angalanissamut atatillugu billetsit nungoreersimasut:
- Angalatitsiviilli soorunami aperineqarsinnaapput, Naalakkersuisut inussiarnersumik kaammattuipput.
Naalakkersuisut akissuteqanngillat
Canadamullu angalanerup immikkuualuttortaanut sorlernut KNR peqataasinnaanersoq, uranisiorfimmillu takuniaanermi KNR aamma peqataasinnaanersoq KNR-ip apeqquteqaatigaa.
KNR matumani sunut peqataasinnaanersoq Naalakkersuisut akinngillat, uranisiorfimmilli takuniaasoqarnissamik pilersaarutit iluatsissimanngitsut ilisimatitsissutigalugu.
Aamma atuaruk Illuinnaasiortumik paasititsiniaasoqartarnera Krarupip eqqarsarnartoqartippaa
Tusagassiorfiit ilanngunneqannginnerarlugit KNR-ip isornartorsiuinera taamaammaat uniuisoq, Naalakkersuisut allapput.
Sermitsiaq.AG-li KNR-iluunniit angalanissamut ilaserineqanngillat, angalasoqarnissaanillu siumut ilisimatinneqaratik.
KNR-ili nammineq aaqqissuussaminik Canadamut angalasinnaanera Naalakkersuisut unitsinniarnavianngikkaat, KNR-ilu immaqa ataatsimiinnerit aaqqissuussinerillu ilaannut peqataasinnaasoq, Naalakkersuisut oqaatigaat.