Illuinnaasiortumik paasititsiniaasoqartarnera Krarupip eqqarsarnartoqartippaa
Politikerit paasisassarsiorlutik, soorlu urani pillugu, ukiuni kingullerni angalasarput. Taamaaliornerminnili tusagassiortunik peqataatitsissanatik.
Tamanna pisarpoq, naak ammasumik ingerlatsisoqarnissaa politikerinit piumassuseqarfigineqaraluartoq, taamaattoq inuiaqatigiit ingerlanneqarneranni, sukarsuit sisamaannik taaneqartartoq, tassa tusagassiuutit peqataatinneqassanatik.
Apeqqusiisoqarneq ajorpoq
Tamanna ajornartorsiutaasoq, Sermitsiaq,AG-p pisortaa, Poul Krarup oqarpoq.
- Oqartariaqarpunga, uranimik qalluisoqarnissaa pillugu paasisassarsiornerni illuinnaasiortoqartartoq, tassa apeqqusiisinnaasunik peqataatitsisoqartannginnera ajornartorsiutaalluni.
Sermitsiaq.AG-p pisortaa, Poul Krarup oqarpoq.
Taassuma erseqqissarpaa, paasisassarsiornerni tusagassiuutit peqataatinneqartartuuppata, ilaatigut uranimut akerliusut aamma tusaaniarneqartassagaluarmata.
Aamma atuaruk Naalakkersuisut ammasumik pissuseqarnissartik puigoqqippaat
Aamma atuaruk Qujaukitsoq: Inissaaleqisoqarnera pissutaalluni tusagassiortunik peqataasoqanngilaq
Tamatumalu saniatigut apeqqutinik pingaaruteqartunik erngiinnarlu puigorneqarsinnaanngitsunik tusagassiortut akissutissarsiniartassagaluartut, Poul Krarup oqarpoq.
- Apeqqut "sooq" apeqqutigineqarneq ajorpoq. Tamatumalu saniatigut isumaqarpunga, peqataatinneqannginnitsinni paasissutissanik eqqunngitsunik paasitinneqartarluta, Poul Krarup oqarpoq, Naalakkersuisullu anguniagaat, soorlu Naalakkersuisut najoqqutassatut oqaaseqaataanni allassimasut imaattuut maqaasisarnerarlugit.
Demokratiskiusumik oqallisigineqartariaqarsoraa
- Aatsitassarsiorneq eqqartorneqartillugu taamatullu tamanna demokraatiskiusumik oqallisigineqartassappat, taava paasisassarsiornerni, soorlu artorfilittat, ilisimasallit politikerillu peqataaneranni, tusagassiuutit peqataatinneqartartuuppata tusagassiuutini oqallinneq pitsaanerussagaluarpoq.
Naalakkersuisut oqaaseqaataanni taama allassimasoqarpoq.
Aamma atuaruk Ammaneq, ammaneq kiisalu ammaneruneq
Uranimik qalluinissaq pineqartillugu tamassumunnga tunngassuteqartut tamarluinnaasa paasititsissutigitinneqarnissaat pingaaruteqarluartuusoq, Poul Karup oqarpoq aamma erseqqissaatigalugu taamaattoqartanngippat siunissatta pitsaasumik politikerinit aalajangersarneqartarnera ernumanarsinnaasoq.
- Taamaattumik urani pineqartillugu tamassumalu qanoq sunniutigisinnaasaat pineqartillugit, tusagassiuutit peqataatinneqarnissaat pingaaruteqarpoq taamaattumik tusagassiuutit suleqataanngitsutut eqqarsaatigineqartarneri qimanneqartariaqartoq isumaqarpunga, Sermitsiaq.AG-p pisortaa, Poul Krarup oqarpoq.