Ammaneq, ammaneq kiisalu ammaneruneq
Nalunaarusiami, Kalaallit Nunaanni Sulisitsisut Peqatigiiffiata suliakkiutaani ilaatigut atuarneqarsinnaavoq, soorlu Aatsitassanut Ikummatissanullu Pisortaqarfik inuiaqatigiinnit tutsuiginanngitsutut isigineqalersimasoq, taakku inuiaqatigiinnut tusarniaatitseriaasii pineqaraangata.
Tutsuiginanngissusermik oqartarneq pinngitsoortinneqarsinnaagaluartoq, Sara Aaenip oqaatigaa.
- Piffissaq sivisooq atorlugu aammalu sulilluarnikkut tamanna anguniagassaavoq. Ammaneq aamma paasissutissiisarneq iliuutsit ajunngivissut ilagaat. Isumaqarpungalu oqartussat paasissutissaateqarunik taava tamakku paasissutigeriannguarlisigit. Nittartakkanut paasissutissat ilineqarlik kikkunnit tamanit atuarneqarsinnaanngorlugit. Taamaaliornikkut matoqqanermik pasineqartarneq peerutissagaluarpoq, Sara Aaen oqarpoq.
Nunatsinni suliassat annertuut Oqartussanit pilersikkiartuaarneqarneranni paasissutissat inunnit amerlanerpaanit paasineqartarnissaat pingaaruteqartoq, Sara Aaenip oqaatigaa.
- Pisariaqartunut ilaavoq paasissutissat kikkunnit tamanit paasineqarsinnaanngorlugit saqqummiunneqartarnissaat. Assersuutigalugu avatangiisinut pinngortitamillu nalilersuinerit, ilaatigut 500-nik quppernillit, kikkunnit tamamit atuarneqartarnissaat piffissaqarfigineqarneq ajorput, taakku naalisarlugit pinngikkaanni. Naalisagaangunillu inuiaqatigiinnut paasissutigissallugit pitsaanerpaassagaluarpoq, Sara Aaen oqarpoq.
Sara Aaenip ilanngullugu ujartorpaa, inuiaqatigiinnit tusarniaanissanik ilisimatitsisarnerit siusissukkut nalunaarutigineqartarnissaat aammalu tusarniaanerit kalaallisut ingerlanneqartarnissaat pingaaruteqarnerarlugu.
Sara Aaen-ip nalunaarusiaani allassimavortaaq, Aatsitassanut Ikummatissanullu Pisortaqarfik inuiaqatigiinnit tatigineerussimasoq. Taamaattoqarnera pissuteqarpoq, Pisortaqarfiup misissuinissanut aatsitassanillu piiaanissanut qinnuteqaatit kisermaallugit suliarisarmatigit aammalu tusarniaatitsinerit namminneerlutik pilersaarusiortarmatigit.
- Tusarniaatitsinerit Aatsitassanut Pisortaqarfimmit aqunneqarunnaarlutik, arlaannaannut attuumassuteqanngitsunut suliakkiunneqartariaqaraluarput soorlu Canadami taama iliortartut. Taamaaliornikkut Aatsitassanut Pisortaqarfik qanoq iliorneri uppernarnerullutillu tatigineqarnerulissagaluarput, Sara Aaen oqarpoq.
Katuami ippassaq nalunaarusiap saqqummiunneqarnerani innuttaasut soqutiginnillutik tusarnaariartut 120-it missaanniipput.
