Naalakkersuisut ammasumik pissuseqarnissartik puigoqqippaat
Naalakkersuisunut ilasortaq Vittus Qujaukitsoq, Kommune Kujallermi borgemesteri, Jørgen Wæver Johansen taassumalu malittai, ilaatigut kommunalbestyrelsemi ilaasortat, Canadamiut uranisiornermi ilisimasaat tusarniareerlugit Nunatsinnut uteqqammerput.
Canadamut angalanermi tusagassiortut ilaatinneqanngillat, soorlu aamma Australiami uranisiorneq pillugu, Naalakkersuisut taamatullu Aatsitassat pillugit Inatsisartut ataatsimiititaliaat siorna angalanerminni tusagassiortunik peqataatitsinngitsut.
Naalakkersuisut Canadamut paasisassarsiornerannut tunngatillugu KNR-imit peqataanissarput pillugu Naalakkersuisunut saaffiginnikkaluarpugut, timmisartumili inissaqatitsisoqannginnera pillugu itigartitaalluta.
Aatsitassarsiorneq pillugu inuiaqatigiinnik peqataatsitisarnissamut maleruagassat qimerlooraanni tusagassiuutit peqataatinneqartarnissaat ersarilluinnartumik piumasaqaataagaluarpoq.
"Inuit oqartussaaqataanerannut tamanna iluaqutaassagaluarpoq"
- Politikerit ilisimasallillu taamatullu oqartussani qaffasissumik atorfillit paasisassarsiorneranni, tusagassiortfiit peqataatinneqarneranni aatsitassarsiorneq pillugu demokraatiskiusumik tamanna tusagassiorfinnit suliarineqartarnissaa qulerutigineqarsinnaanngilaq, Naalakkersuisut oqaaseqaamminni allapput.
Taama allareerlutik siinnersuussutigaat, aatsitassarsiornernut tunngasut pillugit isumasioqatigiinnernut, ataatsimeersuarnernut angalanernullu tusagassiorfiit aallartitaannik peqataatitsisoqartarnissaa akuttunngitsunik piumasarineqartassasoq.
Tusagassiorfiilli ulloq manna tikillugu suli tassa peqataatinneqanngillat.
