Takornarialerisut: Takornariartaassuit Nuup Kangerluaniittussaqqinngillat

Umiarsuarmik takornariartaammik nunatsinni illoqarfinnut nunaqarfinnullu ukiut amerlanngitsut matuma siornatigut tikittoqatuaraangat alutorsaatigineqartaqaaq.

Umiarsuarnilli takornariartaatinik Qaqortumut, Nuummut Ilulissanullu takornarialerisut upaaleruttorfianni maanna tikittoqakulasaqaaq.

Tassa nunatsinnut takornariat imaaginnalernikuupput, taamaaginnarniarpasillunilu.

Nunatsinnilu takornarialerinerup iluanaarniutaaginnaqqunagu tamatumunngarpiaq malittarisassat sukkannernerulernissaannut isumaqataasoqaaluppoq.

- Takornarialerineq suliffissaqartitsiniarnermut aningaasarsiornermullu tunngasuni iluaqutigingaatsiarsinnaavarput. Iluaqutiginiarutsigulli nunatsinni inuiaqatigiit pinngortitarlu qitiutillugit ineriartortittariaqarparput, Arctic Boat Charterimik piginnittoq Erik Palo Jacobsen oqarpoq.

Nunatsinni takornarialerisut attavigisatta ilarpaaluisa isumaqataapput.

Naalakkersuisut takornariartitsineq pillugu inatsisissatut ukioq manna siusinnerusukkut siunnersuuteqartuusut pinngitsoqaratik aamma isumaqataapput.

”Inatsimmi siunertaavoq Kalaallit Nunaannut takornariartitsisarnerup ineriartortinneqarnerata siuarsarneqarnissaa, takornarialerisullu inuiaqatigiit kalaallit ineriartortinneqarnerannut tunniussaqartarnissaat”, naalakkersuisut inatsisissatut siunnersuumminni allapput.

Anders Lykke Laursen Nuuk Water Taximik, umiarsuarlutik takornarianik hunnorujulikkuutaanik Nuup Kangerluani aasaanerani angallassisartuusumik, piginnittuuvoq. Umiarsuit takornariartaatit nammineerlutik Nuup Kangerluanukaraangamik, tassani sulisut akissarsiatigut annaasaqaatigisarpaat, nunatta akileraarutitigut aamma annaasaqaatigisarpaa. Assi © : Karoline Josenius, KNR.

Nunaqavissunut avinngarusimaarfiussasoq

Takornariartitsisarnerup ilaatigut sillimaniarneq, avatangiisit, uumasut inuillu qitiutillugit tunngavigalugit ingerlanneqartarnissaa, inatsisissatut siunnersummi siunniunneqarpoq.

Taamaammat nunatta imartai immikkoortukkuutaasunngortinneqassasut siunnersuutigineqarpoq. Umiarsuit takornariartaassuit sumi qanorsuaq ingerlaarsinnaanissaannut sumilu ingerlaaqqusaannginnerannut malittarisassaqartariaqarpoq.

Nuummi takornarialerisut ilarpaalui isumaqataapput.

- Umiarsuarnik takornariartaassuarnik tikittoqartarnera qujaruppara, taakkuali illoqarfinnuinnaq nunaqarfinnuinnarlu aqqusaartaqqunarput. Kangerlunnuunngitsoq, Erik Palo Jacobsen oqarpoq.

Nunatsinnimi kangerluit nunaqavissunut piniartarfiattut, aalisartarfiattut qasuersertarfiattullu avinngarusimaarfiussasut taamaammallu nunatsinni takornarialerisuinnaat kangerlunni soorlu Nuup Kangerluani angallassisinnaatitaasariaqartut, taanna isumaqarpoq.

- Takornariartitsineruna uagut nunaqavissuusugut iluaqutiginiartussaagipput. Umiarsuit takornariartaatit kangerlukkoortartillugit isertitatigut annaasaqaatigisassavarput, Erik Palo Jacobsen oqarpoq.

Nuuk Water Taximik piginnittoq Anders Lykke Laursen ilaliivoq.

- Nunaqavissuinnaat nunatsinnilu inuussutissarsiortuinnaat - aamma aalisartut, piniartut takornarialerisullu kisimik - kangerlunni angallassisinnaatitaasariaqarput, taanna oqarpoq.

Takornariartaassuit kangerlunni eqqissimasuugaluartumiittussanngitsut

Arctic Boat Charterip Nuuk Water Taxillu umiarsuit takornariartaatit Nuup Kangerluaniitsinneqannginneratigut aningaasatigut iluanaarutigisinnaasatik soqutigalugit isertuutinngilaat. Taamaammat takornariartaassuit kangerlunnukaqqusaanngippata taakku takornarianik tassunga sooq angallassisinnaatitaassanersut apeqqutiginissaa nalorninanngilaq.

- Uagut sumiiffinnik ilisimannittunik kangerlummillu atuisunut allanut ataqqinnittunik nunaqavissunik umiarsuarmi naalagagaqarpugut. Taakku aalisartut piniartullu atortui sumiinnersut aamma arferit pisariaqanngitsumik qanoq akornusersorneqasannginnersut ilisimavaat, Anders Lykke Laursen oqarpoq.

Taassuma umiarsuit takornariartaatit mikinerusut 100-nik ilaasoqartut immaqa kangerlunnikarsinnaatinneqarsinnaasut umiarsuillu anginerusut pulaqqusaassanngitsut siunnersuutigaa.

- Umiarsuaq takornariartaat ilaasuminik 200-nit 300-nut amerlassuseqartunik Qoornumut niusigunik taava tamanna eqqissisimaarniartunut nuannernavianngilaq. Taamaattoqarsinnaanngilaq. Inuit taamaalillutik takornariartitsineq pitsaasumik misigisaqarfiginavianngilaat, Anders Lykke Laursen oqarpoq.

Naalakkersuisut inatsisissatut siunnersuummi takornariartaassuit nunatsinni killeqanngitsumik angalasinnaanerannut killiliisoqassappat uumasoqarneq pingaartumillu aalisarnerup piniarnerullu nalaani eqqarsaatigineqassasut allappaat.

Naalakkersuisut tamatuma saniatigut sumiiffinni sorliit immikkut ittumik killilersuiffiussanersut kommunit nalilissagaat naalakkersuisut siunnersuutigaat.

Takornariartitsineq nunatsinnut pingaaruteqarpoq, kisianni aamma najugaqavissunut suliffissanik pilersitsiffiussaaq, taamaanngippat iluaqutaanavianngilaq, Erik Palu Jacobsen oqarpoq. Assi © : Karoline Josenius, KNR.

Nunap assingisa amigaataanerat kangerlukkut ingerlaarnissamut ulorianartitsisoq

Isumannaallisaanermut isiginnilluarsinnaaneq aamma pingaartoq, Anders Lykke Laursen aamma Erik Palu Jacobsen isumaqarput.

Naak nunatta imartaani immat angallaffiusut asseqaraluartut tatigisassaajuaannanngitsut, Anders Lykke Lausen aamma Erik Palu Jacobsen oqarput.

- Kangerlutta assiliorneqarnerat ajungaatsiarpoq. Kangerluppassuit uuttortarneqarsimanngillat. Taamaammat umiarsuarmik ikkarlittoqaratarsinnaalluni ikkarlummut aportoqarsinnaavoq, Erik Palu Jacobsen oqarpoq.

Umiarsuanik angisuunik mikisunillu nunatsinnut takornariartitsisunik ikkarlinneq pissutigalugu ajutoortoqareernikuuvoq.

Ajutoorneq kingulleq siorna pisoq eqqaaneqarsinnaavoq, tassami takornariartaassuaq Ocean Explorer nunatta kangiani Alpefjordimi 206-inik ilaasoqarluni ikkarlippoq.

Takornariaqarnermut inatsisissatut siunnersuut tusarniaassutigineqalereerpoq, 60-ngajaallu tusarniaanermut oqaaseqaateqareerput.