Paasisassarsiorluni angalanissap tamanut nalunaarutigineqannginnera Avattap isornartorsiorpaa
- Suliniutit paasissutissallu taama pingaaruteqartigisut inuiaqatigiit tamakkununnga tunngasunik malinnaatinneqartannginneri kusanaatsuliorneruvoq. Aamma pitsaasumik paasissutissiisarnissamik neriorsuutit atuutsinneqannginnerat mamianarluni.
Avatangiisit pillugit suliniaqatigiiffimmi, Avatami siulittaasoq, Mikkel Myrup oqarpoq.
Isertuussisoqarsimanerarpaa
Canadamut paasisassarsiorneq naammassimmat, avatangiisit pillugit suliniaqatigiiffimmit, Avatamit angalasoqarsimasoq aatsaat paasineqarpoq.
Suliniaqatigiiffimmi siulittaasup, Mikkel Myrupip maanna paaserusuppaa, kikkut angalasimanersut, suut paasiniarneqarlutik oqaloqatigiissutigineqarsimanersut aamma suna siunertarineqarsimanersoq.
- Tupinnaqaaq angalaneq taamaattoq isertuunneqarsimammat. Paasisassarsiornerit taamatut ittut Nunatsinnullu pingaaruteqarluartut pillugit ammasumik tamanna paasissutigineqartariaqaraluarpoq. Naalakkersuisullu killuup tungaanut ingerlanertik taamaalillutik ajoraluartumik takutippaat, Mikkel Myrup oqarpoq.
Aamma atuaruk Naalakkersuisut ammasumik pissuseqarnissartik puigoqqippaat
Aamma atuaruk Qujaukitsoq: Inissaaleqisoqarnera pissutaalluni tusagassiortunik peqataasoqanngilaq
Inuussutissarsiornermut, Suliffeqarnermut, Niuernermut Nunanullu allanut tunngasunut Naalakkersuisoq, Vittus Qujaukitsoq angalaneq pillugu oqarpoq, sumut angalasimaneq aamma peqataasut sunik paasisaqarsimaneri pillugit paasissutissat tamaasa saqqummiunneqassasut.
Avattalli siulittaasuata taama neriorsuinerit toqqissiallaatiginngilai oqarluni maanna Naalakkersuisuusut siuliisa, tassa Inuit Ataqatigiit naalakkersuisuutitaqarnerisa nalaanni, pissutsit pitsaanerulaarsimasut, tassa taamani Aatsitassat pillugit Naalakkersuisuusup, Ove Karl Berthelsenip urani pillugu paasisitsisarnera pitsaanerulaartutut oqaatigalugu.
Paasisassarsiorluni angalaneq kingulleq illuatungiinnaasiorpallaartoq, Mikkel Myrup naliliivoq.
- Paasissutissiisarneq killuup tungaanut maanna ingerlalersimavoq allaat oqartoqarsinnaalluni, Kuannersuarni aatsitassarsiornissap aallartinnissaa uaneerarsuarmiileraluartoq paasissutissiisoqartarunnaavissimalluni.
Paasissutissiisoqartannginnera ernumagaa
Greenland Minerals and Energyp Kuannersuarni aatsitassarsiornissamut qinnuteqaataata nassiunneqarnissaanut piffissaq uaneerakasinngortoq eqqarsaatigalugu, Naalakkersuisut amigartumik paasissutissiisarnerat ernumanartutut isigineqartariaqartoq, Mikkel Myrup aamma oqarpoq.
- Suliniutit angisoorsuit pillugit taama isertortigineq ernumanartoqarpoq.
Avatangiisit pillugit suliniaqatigiiffimmi, Avatami siulittaasoq, Mikkel Myrup oqarpoq.
Canadami uranisiorneq pillugu politikerit paasisassarsiornerannut KNR-imit peqataanissarput kissaatigisimagaluarparput, timmisartumili inissaqartitsisoqannginnera pillugu itigartinneqarluta.