Visit Greenland: Ilulissani akerliussutsimik takutitsineq nunatta angalaffissaqqissutut isigineqarneranut innarliisinnaasoq
Ilulissanut sapaatip akunnerata naanerani takornariartut Ilulissani takornariartitsisut umiarsuup takornariartaatip gummibådiinut, ilaasuminnik aallerniartunut assersuinerannik isiginnipput.
Pisoq umiarsuit takornariartaatit tikiffimminni inuiaqatigiinnut naammattumik tapersiissuteqartarnersut pillugit piffissami sivisuumi aaqqiagiinngissuteqartoqarnerani pisuni annerpaavoq.
Sapaatip akunneratali naanerani pisoq uissuumminartoq annertunerulinngilaq. Aaqqiagiinngissuteqarneq unitsinneqarallartoq, suliffeqarfik takornariartitsisartoq Unique Tours Ilulissat Facebookikkut allappoq.
Lars Erik Gabrielsen umiarsualivimmi talittarfimmi sapaatip akunnerata naanerani akerliussutsimik takutitsinermi siuttuugaluarpoq.
Visit Greenlandip aaqqiagiinngittoqarnera sapaatini akunnerni kingullerni qanimut malinnaaffigalugulu illuatungeriit ilaasut qanimut oqaloqatigiissuteqarfigai.
Visit Greenlandimi pisortap, Anne Nivíka Grødemip akerleriinnermi illuatungeriit pakatseqqanerat uppernarsarpaa.
Takornariartitsinermi siunnersuisoqatigiit tamanna nunatta takornariarfissatut tusaamaneqassusaanut iluaqutaanngitsoq aamma nalilerpaat.
- Takornariat akerliussutsimik takutitsisunik naapitsinerat angalanermi misigisaannut nunattalu angalaffigisassatut anguniakkamut ajoqusiisumik sunniuteqarsinnaavoq, Anne Nivíka Grødem oqarpoq.
Nunaqavissut tusaaneqarnerorusuttut
Nunaqavissut arlallit nunatsinni takornariartitsinermi ilaarusuttut ukiuni kingullerni malunnarneruleqaaq. Ineriartorneq tamanna Visit Greenlandip tapersersorpaa.
Anne Nivíka Grødemip oqarnera naapertorlugu takornariartitsisarnerup qanoq ilusilerneqarnissaata oqaluuserineqarnissaata pisariaqalernera nalinginnaasuullunilu pitsaasuuvoq.
- Iluatsilluartumik inuussutissarsiornermut pitsanngorsaanitsigut aaqqiagiinngittoqalersoraara. Nunaqavissut takornarialerisut ineriartornermut peqataarusunnerisa annertusiartornera ersarissumillu pisariaqartitsinerat malugaarput, taanna oqarpoq.
Lars Erik Gabrielsen taakku ilagaat, taassuma KNR-imit apersorneqarnermini umiarsuit takornariartaatit angalanernillu tuniniaasartut nunaqavissut takornariartitsisut salliuttanngikkaat isornartorsiorpai.
Angalanernik tuniniaasartut taakku umiarsuit takornariartaatit sumiiffinnilu takornariartitsiviit akornanni attaveqaatitut suliaqaraangamik ilaatigut akilerneqarluartarsorai.
Taassumalu angalanernik tuniniaasartut sumiiffimmi aningaasaqarnermut tapiissuteqangaarneq ajortut aamma isornartorsiorpaa, taakkumi Ilulissani najugaqaratilluunniit illoqarfimmut akileraaruteqarneq ajormata.
Tamannali Greenland Cruisesimik piginnittumit, Ivik Ostermannimit eqqunnginnerarneqarpoq, suliffeqarfik taanna umiarsuarnut takornariartaatinut arlalinnut angalanissanik tuniniaasartuuvoq.
- Misigisimavunga pimoorutivillugu illoqarfimmi takornarialerisunik tapersersuillunga. Illoqarfimmi takornarialerisut, umiatsiaatillit illoqarfimmi bussiutillit il.il sullissisutut atortarpakka, taanna KNR-imut oqarpoq.
Takornariaqarneq nunatsinnut tamarmut iluaqutaassasoq
Nunatta takornariaqarneq pissarsiaqarfiginerpaassagaa Visit Greenlandip suliarisarpaa. Taakkulu takornariaqarnerup qanoq ilusilerneqarnissaanut politikerit sinaakkusiinissamut akisussaaffeqartut oqaatigaat.
- Sinaakkutitut piumasaqaatit politikerinit pilersinneqartarput. Visit Greenlandillu sinaakkutit taakku malillugit takornariaqarnermik inuussutissarsiuteqarneq nunatsinnut tamarmut inuiaqatigiinnullu ataatsimoortumik iluaqutaanissaa sulissutigisarpaa, Anne Nivíka Grødem oqarpoq.
Taassuma nuna tamakkerlugu takornariaqarnermut inatsisissamik nutaamik nunaqavissullu takornariartitsisut pitsaanerpaamik periarfissaqarnissaannik siunertaqartumik takornariaqarnermi periusissiamik suliaqartoqartoq eqqaasitsissutigaa.
Tassanilu kikkut tamarmik nunatsinni takornariaqarnerup qanoq innissaanut sunniuteqarnissamut periarfissaqarput.
