Angallassisartoq uparuaatigineqartumut qisuariaateqarpoq: Illoqarfimmi innuttaasut suleqatigilluartuaannarpakka
Ukiut qulikkaat kingulliit ingerlanerini, umiarsuit takornariartaatit Ilulissanut tikittartut amerleriarujussuarsimapput. Ukuit siuliini umiarsuit tikittartut ikittunnguunikuugaluartut, aasaq manna 85-it tikissapput.
Tamanna illoqarfimmi takornarialerinermik suliaqartunut ulapaartitsivoq. Takornarianik sulillissisut takornariarpassuit alapernaaqisut, immami iluliarsuit immikkuullarissut aammalu umiarsuit takornariartaatit akornanni, uniaaluttutullusooq ilillutik ulapipput, takornariat takornariartaassuarnut ilaallutik misigerusutaat, iluliarsuit immikkooruteqarluinnartut takuneqarnissaat peqqutaalluni.
Takornariaqarnermilli sullissisut ilaasa tamanna nuannaarutiginngilaat.
Taakkuami isumaqarput sullissinerminni naammaginartumik akilerneqartaratik. Lars Erik Gabrielsen, takornarianut sullissivimmi Unique Tours Ilulissat ingerlatsisuusoq taamatut KNR-mut oqaaseqarpoq.
- Takornariat naammattumik akiliisarput, kisianniuna akunnermuliuttuusoqartoq annertuumik iluanaarutissap ilaanik pissarsisartumik. Taanna iluanaarut illoqarfimmiut iluaqutiginngilaat, tassami akunnermuliuttut illoqarfimmi najugaqartuunngimmata. Aningaasat allanut atortarpaat, Lars Erik Gabrielsen oqarpoq.
Angallassisartut ilaat Lars Erik Gabrielsen-p uparuagaa tassaavoq Greenland Cruises, Ivik Knudsen-Ostermann-mik Nuummi najugaqartumik pigineqartoq.
Ivik Knudsen-Ostermann KNR-mut allagaqarluni, illoqarfimmi innuttaasunut iliuuseqannginnerarneqarnini eqqunngitsuunerarpaa.
- Misigisimavunga pimoorutivillugu illoqarfimmi takornarialerisunik tapersersuillunga. Illoqarfimmi takornarialerisut, umiatsiaatillit illoqarfimmi bussiutillit il.il sullissisutut atortarpakka.
Takornarianik sullissisut sioqqutisumik akigitinneqartut akuerisarpaat
Ivik Knudsen-Ostermann KNR-mut nassuiaavoq, nammineq ukiut qulit sinnerlugit, umiarsuarnik takornariartaataasunik nunatsinni sullissisarsimalluni. Avataaniit takornariaqarnermik sullissisut attavigisarpaat, namminneq illoqarfimmi takornariaqarnermik sullissisut attaviginnginniassagamikkit.
- Angallasseqatigiiffimmut ajornannginneruvoq attaveqaammik (agent) atuineq. Taamaalillutik namminneerlutik illoqarfimmi takornarialerisunut attaveqassanngillat. Uanga angalanissamut pilersaarutaat tigusarpara, taamaalillungalu sumiiffinni suut neqeroorutaanersut paasiniarlugu aallartittarpara. Tammana amerlanertigut illoqarfimmi takornarialerisut, peqatigiiffiit aammalu angallassisartut suleqatigalugit pisarpoq. Taamatut oqarpoq Ivik Knudsen-Ostermann.
Taassumap ingerlannerata nalaani, Greenland Cruises aammalu illoqarfimmi takornarianik sullissisinnaasut akornanni, isumaqatigiissutaareertarpoq angallateeraatillit qanoq akilerneqassanersut.
Ivik Knudsen-Ostermann akissuteqarnermini, Lars Erik Gabrielsen-p uparuaataa, tassalu illoqarfimmiut iluliarsuit akornani angallassinerminni 400 kr. kisiisa angullugit akilerneqartarnerat qisuariarfiginngilaa.
- Appasissumik akeqartitsisarnera iluatsitsiffigilluarnikuuvara. Taamaattumik aamma aasaq kaajallallugu, illoqarfimmi umiatsiaaraatillit angallassinissanik amerlasuunik neqoroorfigisinnaasarlugit. Taamatut oqarpoq Ivik Knudsen-Ostermann.
Umiarsuaatileqatigiiffiit illoqarfimmi suliffiqarfeqalersinnaanissaannut sunnerniartarpai
Ivik Knudsen-Ostemann-p oqaatigaa, umiarsuarnik tukornariartaatinik sullissiveqarfiit, illoqarfimmi aningaasanik kaaviiaartitsisinnaanissaat annertusarniarlugu annertuumik sunniiniaanermik suliniuteqartarluni.
Ilaatigut erseqqissaassutigivaa takornariat angallanneqassatillugit, umiarsuaatileqatigiiffiit ilaat namminneq umiatsiaaraatitik atortarunnaarsimagaat. Maannakkullu umiarsuarnik takornariartaatinik illoqarfimmiittoqartillugu, illoqarfimmi sullissisinnaasut atorneqartalersimasut.
- Umiarsuaatileqatigiiffiit illoqarfimmi umiatsiaatilinnik atuisarnissamut saannissaat misilittarsimavara. Una aasaq aallarnerfigalugu, umiarsuaateleqatigiit ilaat ataaseq, namminneq gummibåd-iutitik atornagit, illoqarfimmi umiatsiaatilinnik atuilersimapput.Taamaattumik misigisimalluinnarpunga illoqarfimmi sullissisinnaasut tapersersorneqarnissaanik suliniuteqarlunga.
