Inuussutissarsiutit

Takornarialerisut akerliusut: Allamiut aningaasarsiutigaatigut

Umiarsuit takornariartaatit allallu nunanit allaneersut takornariaqarnermik aningaasarsiortut ingasaleqimmata Ilulissani takornarialerisut akerliussutsimik takutitsipput. Nunaqavissummi iluanaaruteqartariaqarput.
Takornariarpassuit Ilulissanut ukiut tamaasa tikittartut nunaqavissunit iluanaarutigineqanngippallaartut, Lars Erik Gabrielsen isumaqarpoq. Tamanna pissutigalugu umiarsuarnut takornariartaatinut suleqatigisartagaannullu akerliussutimik takutitsinermi peqataavoq. Assi © : Hanna Vestergaard Hviid
Allattoq Mads Malik Fuglsang Holm , Hanna Vestergaard Hviid
juulip 24-at 2024 14:38

- Iluliarmiuuvunga. Illoqarfiga inunngorfiga peroriartorfigalu asavara ineriartortorlu takorusuppara.

Takornarialerinermik sulialik Lars Erik Gabrielsen taama oqarpoq, taassuma Unique Tours Ilulissat ingerlataraa, inuillu Ilulissani najugaqanngitsorpassuit takornarialerinermik aningaasarsiortut naammatsiffigilluinnarpai.

Taamaattumik taanna illoqarfimmi takornarialerisut allat peqatigalugit umiarsuit takornariartaatit taakkulu suleqatigisartagaat qatsukkamikkit Ilulissani umiarsualivimmi allagartarsualisarlutik akerliussutsimik takutitsipput.

- Oqaloqatiginiartaraluarneri iluatsinneq ajormat taamaaliortariaqalerpugut, Lars Erik Gabrielsen oqarpoq.

Nunaqavissut takornarialerisut nalaataat aaqqiiviginiarlugu umiarsuarnik takornariartaatillit arlaleriarluni ataatsimeeqatigineqartartut allaallumi Hamborgimut Islandimullu ataatsimiigiarsimallutik Lars Erik Gabrielsen oqarpoq. Iluaqutaalaaginnarporli.

- Takornarianik maanna sunniinialerpugut. Taakkumi umiarsuarnik takornariartaatileqatigiiffiit tigumatuut pinnagit nunaqavissunik tapersersuerusupput.    

Lars Erik Gabrielsen takornariartitsinermik ingerlataqarpoq, Qeqertasuullu tunuani angallassisarluni. Assi © : Unique Tours.

Akunnermiliuttut iluanaartartut

Ilulissat Excursions Ilulissani takornarialerisut qulingiluaasut ataatsimoorlutik suleqatigiiffigisaanni Lars Erik Gabrielsen ilaavoq, taassuma oqarnera naapertorlugu takornariartaatinik umiarsuaatileqatigiiffiit Ilulissat kangerluannut takornariamut ataatsimut 1.100 koruunit tungaanut akiliisinnaasarput. Takornarialerisunillu nunatsinneersunik isumaqatigiissuteqarnermi aningaasat amerlanerpaartaat nunaqavissunut iluanaarutaassapput.

Ilulissanili takornarialerisut amerlanertigut 400 koruuniinnarnik iluanaaruteqartarput. Tamanna angalanissanik tuniniaasut akunnermiliuttarnerminni iluanaarnerpaasarnerannik pissuteqartoq, Lars Erik Gabrielsen oqarpoq. Inummummi ataatsimut 1.100 koruuninit akiliutigineqartunit 700 koruunit tuniniaasumut iluanaarutaasartut taanna oqarpoq. Sinneruttullu 400 koruunit nunaqavissunut iluanaarutaasarput.

Allatut oqaatigalugu - tuniniaasut tigumatuallaarput.

- Takornariat akiliilluartarput, akunnermiliuttulliuku iluanaarujussuaannartartut. Tuniniaasullu nunani allani najugaqarmata nunaqavissut iluanaaruteqarneq ajorput. Aningaasat nunatsinnit aniapput.   

ANGALANERNIK TUNINIAASUT SULERISARPAT

Umiarsuit takornariartaatit amerlanerpaat angalanernik tuniniaasartunik suleqateqartarput, taakku umiarsuarnik nunatsinnut tikittussanik tamanik piareersaaqataasarput.

Tuniniaasartut umiarsuit takornariartaatit aamma nunaqavissut takornarialerisut akornanni ataqatigiissaarisarput.  

Tuniniaasartut umiarsuarni angallassisoqakkajuttarput, umiarsuanilu ilaasunut sulisunullu ikiuuttarlutik.

Tuniniaasartut ilaat namminneq angallateqartarput aqqusaarnermi atorneqartartunik, ilaalli nunaqavissut angallataannik attartortarput.

Lars Erik Gabrielsenip umiarsuit takornariartaatit ajoriffissaqartinngikkaluarpai, taamaattorli aningaasat kaaviiaartitat kommunip aningaasaqarneranut iluaqutaanerullaqugaluarpai, taamalu aamma takornariaqarnerup amerlanernut iluaqutaalernissaa kissaatigalugu.

Visit Greenlandip kisitsisaatai naapertorlugit umiarsuit takornariartaatit 80-init amerlanerusut Ilulisssanut aasaq manna tikissapput.   

Aamma atuaruk