Ilisimatooq: Naalakkersuisut aalisarnermut inatsisimik kinguaattoortitseqqeratarsinnaapput
Aalisarneq Kalaallit Nunaanni inuussutissarsiutit annersaraat, taamaattumik aalisarnermut ataatsimiititaliarsuassamik suliaqarnermi Naalakkersuisut Demokraatillu saniatigut inuussutissarsiutinik ingerlataqartut partiillu allat peqataannginnerat ajuusaarnarpoq.
AAMMA ATUARUK Naalakkersuisooqatigiit tapersersortaasalu isumaqatigiinnginnerat pissutaavoq
Ilisimatusarfik inuiaqatigiilerinermik ilisimatooq soraarneq Birger Poppel taama isumaqarpoq.
- Suliamik ammasumik ingerlatsinnginneq aammaarlugu takugatsigu, tamanna qinersisartut politikerinut tatiginninnerannut ajoqutaasinaasoq uanga nammineq isumaqarpunga, taanna oqarpoq.
Naalakkersuisut Demokraatillu Aalisarnermut Ataatsimiititaliarsuaq pillugu Ilulissani sapaatip akunnera kingulleq ataatsimiipput.
Isumasioqatigiissitsinermi Naalakkersuisut qaammatip matuma qiteqqunnerani aallartittussatut neriorsuutigisaata tassa Aalisarnermut Ataatsimiititaliarsuup utaqqisaajuartup naammassinissaa siunertarineqarpoq.
Partiilli isumasioqatigiissitsinerup kingorna nalunaaruteqanngillat aamma aalisarnermut, piniarnermut nunalerinermullu naalakkersuisup Nikkulaat Jeremiassenip (S) suliaq pillugu apersorneqarnissani itigartitsissutigaa.
Kinguaattooqqanerup inuussutissarsiorneq kigaalaquseraa
Aalisarnermut Ataatsimiititaliarsuup suliarineqarnerani akuutitsinnginneq Inuit Ataqatigiinnit ilaatigut isornartorsiorneqarpoq. Birger Poppelillu oqarnera naapertorlugu inuussutissarsiutinik ingerlataqartut peqataatinneqannginnerat, nutaamik aalisarneq pillugu inatsisiliorniarnermut unittoortitsisinnaavoq, soorlu aamma 2017-mi taama pisoqartoq.
AAMMA ATUARUK Suliap maannakkut killiffia naammaginanngilaq
- Tamanna inuussutissarsiummik ingerlataqartut anguneqartumut peqataasutut migisiunnaanerannik kingunerisinnaallugu, taavalu soqutigisatik ilungersuutigilerlugit. Tassalu taamanisut inatsissatut siunnersuuteqalersinnaavoq, inuiaqatigiinni isumaqatigiinngissutaaqisumik, ilisimatooq nangippoq.
Taakkua saniatigut sinaakkutissatut atugassarititaasut piffissami sivitsortumi qularutigineqarmata, aalisarnermi qularnermik pilersitsisoqarsinnaavoq.
- Ungasinnerusumut isumaliutigineqartut eqqarsaatigalugit aalisarnermut arlaannik kinguneqarsinnaavoq. Tassa aalisariutit annerit minnerillu aningaasaliinissamut nutarterinissamulluunnit aalajangiinissartik tunuarsimaafigisinnaavaat.
Aalisarnermut piniarnermut nunalerinermullu Naalakkersuisoq Nikkulaat Jeremiassen (S) KNR-imit marlunngornermi oqaaseqartinniaqqikkaluarparput taassumali apersorneqarnissani kissaatiginngilaa.
Aalisarnermullu Ataatsimiititaliarsuup naggataatigut inaarutaasumik nalunaarutissaata atuutinneqalernissaata naatsorsuutigineqarneranut tusagassiuutinut nalunaarut innersuussutigaa.
