KNAPK: Naalakkersuisooqatigiit tapersersortaasalu isumaqatigiinnginnerat pissutaavoq
Henrik Sandgreen KNAPK-mi siulittaasoq isumaqarpoq Naalakkersuisoqatigiinni politikkikkut isumaqatigiinngittoqartoq.
Taanna taama oqarpoq, Naalakkersuisoqatigiit aamma taakkua tapersersortaat Demokraatit aalisarnermut ataatsimiititaliarsualiornissaq pillugu Ilulissani isumasioqatigiinnerat kinguneqanngimmat.
- Naaperiagassat uani annertupput, Naalakkersuisuni maannakkut ingerlatsisuni, isumaqarpunga maannakkut piffissami assut kinguarsaataasoq, minnerunngitsumillu partiit nammineq iluminni aalisarnermut polikkiminni avissaaqqanerat tassani apeqqutaanerpaasoq, Henrik Sandgreen oqarpoq.
AAMMA ATUARUK Aalisarneq pillugu ataatsimiititaliarsuaq pillugu Ilulissani isumasioqatigiittoqalersoq
Nikkulaat Jeremiassen februarimi neriorsuivoq, ataatsimiititaliarsuaq februaarip qiteqqunnerani aallartissasoq, tamassumalu piviusunngortinneqannginnera Henrik Sandgreenip toqqissisimanartinngilaa, taannami isumaqarpoq aalisarneq pillugu inatsissap aamma ataatsimiititaliarsuarmik pilersitsinissaq pillugu inuiaqatigiinni oqallisigineqarnera sammiveeruttoq.
- Taamaattumik suliaq torersumik ingerlanneqassappat, saneqqunneqarsinnaanngitsoq tassaavoq, kattuffinnut qanittumik paasissutissiinissaq.
AAMMA ATUARUK Aalisarneq pillugu ataatsimiititaliarsuaq suli pilersinneqanngitsoq
Taanna isumaqarpoq aalisarnermut attuumassuteqartut aalisarnermut ataatsimiititaliarsuarmi sulinermi peqataatinneqartariaqaraluartut, immaqalu suliaq sukkanerusumik suliarineqarsimassinnagaluartoq.
Henrik Sandgreenimi isumaqarpoq, aalisarnermut ataatsimiititaliarsuup katiterneqarnissa iluatsinngippat qinersinermik kinguneqarsinnaasoq.
- Imaluunniit inatsisissamut tunngasumi aaqqiagiinnginneq partii akornanni ima annertutigaa, aallaat immaqa qinersinissaq aallaat eqqartorneqartariaqalerluni, KNAPK-ip siuliuttaasua Henrik Sangreen taama oqarpoq.
Aalisarnermut Ataatsimiititaliarsuup pilersinneqarnissaannut Naalakkersuisut to million kr-nik immikkoortitsinikuupput.