Aalisarneq pillugu ataatsimiititaliarsuaq pillugu Ilulissani isumasioqatigiittoqalersoq
Aalisarnermut inatsisissaq nutaaq ukiorpaalussuarni piareersarneqarpoq, massakkullu nutaamik inatsisiliornissamut alloriartoqarpoq.
Tassami Naalakkersuisut partiilu tapersersortaat Demokraatit aqagu pingasunngornermi Aalisarnermut Ataatsimiititaliarsuarmik pilersitsinissaq pillugu isumasioqatigiissitsiniarput. Ataatsimiititaliarsuup aalisarnermut inatsisissamut nutaamut ukiorpaalussuarni piareersarneqartumut siunnersuut oqallisigissavaa.
Kisianni Naalakkersuisut siulittaasuat, Kim Kielsen, Siumut, imaluunniit Aalisarnermut Piniarniarnermullu Naalakkersuisoqarfik isumasioqatigiissitsinissaq pillugu massakkut oqaaseqartissinnaasimanngilavut.
Partiit naalakkersuisooqatigiit, Demokraatit aamma Inuit Ataqatigiit 2019-imut aningaasaqarnermut inatsisit pillugit isumaqatigiissutaanni aalisarnermut ataatsimiititaliarsuarmik pilersitsinissamut Inatsisartut 2 millionit koruunit immikkoortippaat.
AAMMA ATUARUK Naalakkersuisut aalisarneq pillugu ataatsimiititaliarsuarmik suli pilersitsinngitsut
Isumaqatigiissutip kinguneraa aalisarnermut ataatsimiititaliarsuarmik pilersitsisoqassasoq, tassani ilaatigut aalisarnermik inuussutissarsiortut taakkulu kattuffiisa sinniisaat ilaatinneqassapput.
Kingullermik februaarip aallartinnerani Inuit Ataqatigiit naammagittaalliuutigaat aalisarnermut ataatsimiititaliarsuaq suli pilersinneqarsimanngimmat. Tassunga atatillugu aalisarnermut piniarnermullu naalakkersuisoq Nikkulaat Jeremiassen neriorsuivoq ataatsimiititaliarsuaq februaarip qiteqqunnerani aallartissasoq.
Ataatsimiititaliarsuup aalisarnermut inatsisit nutaat aamma aalisarnerup ineriartortinnissaanut periarfissanik sunniisussat innersuussuteqarfigissavai, taamalu aalisarnermik inuussutissarsiuteqarnerup isumalluutillu inuiaqatigiinnut annerpaamik iluaqutaanissaat qularnaassallugu.
AAMMA ATUARUK Aalisarneq pillugu inatsisissaq ataatsimiititaliarsuarmut suliassanngortinneqartoq
