Akerliussutsimik takutitsinerup kingorna: Naalakkersuisup aalisakkat akiisa qaffanneqarnissaat neriorsuutigisinnaanngilaa
Aalisartut piniartullu ilaatigut Nuummi, Maniitsumi Qaqortumilu akerliussutsimik takutitsimmata oqariartuutit sakkortuut allagartarsuit naammaginninngitsutullu ersersitsisut nalaatassaapput. Taakku qinikkanut Royal Greenlandimullu saarulliit akiisa piffissami kingullermi appariartornerat pillugu akerliunerminnik takutitsipput.
Aalisartut piniartullu kattuffiata KNAPK-p, akerliussutsimik takutitsinissamik aaqqissuussisup Royal Greenland Atuisoqarnermut Unammilleqatigiinnermullu aqutsisoqarfimmut aamma unnerluutigigaa. Tassanngaanniillu akissuteqartoqartinnagu aalisarnermut naalakkersuisoq, Kim Kielsen neriorsuerujussuarusunngilaq.
- Imaanngilaq ulluinnarni KNAPK-mik oqaloqatiginnittarnigut allatigullu matusut aamma Royalimut matusut. Soorunami massakkut arlaatigut iliuuseqartoqarnissaa pisariaqartutut isigineqarpoq aalisartuninngaanniit. Taamaammat qanutut ujartuisoqarsinnaanissaa aamma uagut pisussaaffeqarpugut iliuuseqassallut. Kisianni akit tungaatigut neriorsuisinnaanngilanga qummut qaffanneqassasut imaluunniit minnerpaaffilerneqassasut, taanna KNR-imut oqarpoq.
Tassunga akuliussinnaavisi?
- Toqqaannartumiunngitsoq, kisianni ataatsimeersuarneranni qaqinneqarsinnaavoq, maannakkullu aalisarnermut inatsimmi nutaami aalisartut avammut tunisisinnaanermut periarfissaanik pilersitsiniarleruttorpugut. Taamaammat naalakkersuisuni sapaatip akunnerata tulliani qaqinneqassaaq tusarniaassutigineqarlunilu, taanna oqarpoq, nangillunilu:
- Aalisarnermut inatsit upernaamut naammassinissaa neriuutigaara, tamanna anguniagaraara. Taamaalilluni periarfissagissaarnerulerlunilu akigissaarnerusoqalissaaq.
Naalakkersuisut isumaqatigiinniarnerni siuttuusinnaanerat Royal Greenlandilu akinik qaffaaqqullugu piumasaqarsinnaaneranut, inatsisitigut aporfissaqanganngitsoq inatsisilerituup oqaatigaa. Maleruagassat nunarsuarmilu akigititat malillugit aalajangiineruppat ajornanngilaq.
Tamanna Københavns Universitetimi niuernermut inuussutissarsiornermullu inatsisinik ilisimatusarfimmi, Center for Markeds- og Erhversretimi inatsisilerituup professorillu, Karsten Naundrup Olesenip KNR-imut siusinnerusukkut oqaatigaa:
- Royal Greenland Namminersorlutik Oqartussanit pigineqarpoq, taamaattumillu isumaqatigiinniarnermut taamaattumut ikiuussinnaapput. Malittarisassat malinneqarpata inatsisit unioqqutinneqassanngillat.
Aalisartunut sakkortusoq
Nuummi Royal Greenlandimi saarullinnik tunisinermi akigitinneqartoq 23 procentimik apparpoq, Kim Kielsenillu akit appariartornerat unammillernartoq nassuerutigaa.
- Tassa soorunami naalaaqqissaarpakka. Aamma nalunngilara ulluinnarni taakku akornaniittarpunga, taamaammat uani ujartuisariaqarpugut periarfissanik, qanoq ittuugaluartunilluunniit. Kisianni akit tungaatigut tassa oqaqqissaanga allamiippoq.
KNAPK-p siulittaasuata Nikkulaat Jeremiassenip akit taama appasitsigiinnarpata aalisartut akiliisinnaajunnaaratarsinnaasut siusinnerusukkut oqaatiginikuuaa. Taamali naliliiuminaatsoq, Kim Kielsen isumaqarpoq:
- Maannakkut saarullittassanut tunngatillugu pisassat immaqa tamakkipajaarnikuupput, taakku akigissaarnerata nalaani qallorneqarnikuupput, massakkut immaqa ilasissaagut allaat saarullittassanik. Kisianni tassa tassunga killinnissaa uanga nalornissutigivara, inuit ataasiakkaat apeqqutaasarput qanoq qalluitigisimanersut, Kim Kielsen oqarpoq.
Royal Greenlandip akit apparnerat nunarsuarmi nioqquteqarnermi akinik pissuteqartoq pingaartumillu Ruslandimeersut akitigut apparsimasut siusinnerusukkut oqaatigaa.
