Angut Nuummi Blok 5-imi toqungasoq quimi nassaarineqartoq
Angut toqungasoq Nuummi H.J. Rinksvejimi Blok 5-imi quimi tallimanngornermi nassaarineqarpoq.
Kalaallit Nunaanni Politiit tusagassiorfinnut nalunaarummi taama allapput.
Kalaallit Nunaanni Politiit angut 20-nik ukiulik toqungasoq nassaarineqarsimasoq pillugu ippassaq tallimanngornermi ullaap tungaani nalunaaqutaq qulit qaangerai tanneq sisamat missaanni kalerrinneqarput. Angut toqungasoq kinaassusersineqareerpoq, ilaqutaasullu ilisimatinneqareerlutik.
Politiit toqungasumik nassaarfimmi suli misissuipput, sumiiffillu misissuinermut atatillugu assersorsimallugu. Ilisimannittunik taassuma saniatigut killisiuisoqarsimasoq, tusagassiorfinnut nalunaarummi allassimavoq.
Toqusimasumik misissuisartoq, pinerluttoqarsimaneranillu misissuisartoq Danmarkimit taassuma saniatigut aggersarneqarsimapput. Taakku misissueqataassapput, sapaatillu akunnerata tulliata aallartinnerani tikissallutik.
Ilisimannittut suli saaffiginneqquneqartut
Politiit angutimik toqungasumik nassaarfiusumi suli sulipput, assersuinerullu innuttaasunit ataqqineqarnissaa kaammattuutigineqarpoq.
- Innuttaasut Blok 5-ip nalaani pasinartumik sapaatit akunnerata kingulliup ingerlanerani maluginiagaqarsimasut, paasissutissaateqarsinnaasulluunniit politiinut suli saaffiginneqquneqarput, tusagassiorfinnut nalunaarummi ilaatigut allassimavoq.
Kalaallit Nunaanni Politiit oqarasuaataasa normoraa 70 14 48.
KNR toqungasumik nassaartoqarnera pillugu paasissutissanik, tigusarinnittoqarsimanersorluunniit pillugu paasissutissanik suli pissarsiniarsarivoq. Politiit itinerusumik suli oqaaseqarsinnaannginnerarput.
