Inatsisileritooq: Naalakkersuisut aalisakkat akii pillugit isumaqatigiinniarsinnaapput

Naalakkersuisut nipisaat suaasa akiinik isumaqatigiinniarnernut ilanngussinnaasut inatsisileritooq naliliivoq. Illuatungeriilli isumaqatigiinngitsut nammineq aaqqiissuteqartariaqartut naalakkersuisunit kajumissaarneqarput.

Allattoq Kim Hinrichsen

apriilip 18-at 2023 07:31

Nutserisoq Nathan Kreutzmann

Tamanna aatsaat pilinngilaq. KNAPK-p Royal Greenlandillu isumaqatigiinniarnerat ukioq manna ajalusooqqippoq. Nipisaat suaasa akii ukioq manna kingumut isumaqatigiissutigineqarsinnaanngillat.

Royal Greenlandip pisortanit pigineqarnera pissutigalugu KNAPK akerleriinnermut akuliuteqqusilluni Naalakkersuisunut arlaleriarluni saaffiginnittaraluarpoq. Naalakkersuisulli akuliukkusunngillat.

Naalakkersuisut isumaqatigiinniarnernut akuliussinnaanersut akuliussinnaannginnersulluunniit nalornissutigineqangaatsiarpoq – inatsisilli malillugit naalakkersuisut isumaqatigiinniarnermik ingerlatsilersinnaanerat ajortussaanngilaq. Taakkumi piginnittuupput aalajangiisussaallutillu.

SULIAQ NAATSUMIK

Aalisartut apriilip aallaqqaataani nipisanniarsinnaanngortarput. Ullunilu 60-ini nipisanniarsinnaatitaapput.
Ukioq mannali taamaattoqanngilaq.
Isumaqatigiinngissut siornarnisaq qaqeqqinneqarpoq.
Royal Greenlandip nipisaat suaannut tunisanut kiilumut 22 koruunimik akiliuteqarniarneranut isumaqatigiinnginneq tunngassuteqarpoq - tamanna annikippallaartut aalisartut isumaqarput, taakkulu tamanna pissutigalugu qassutitik nunamiitsiinnarpaat.
Royal Greenlandip kiilumut 22 koruuni siorna aamma neqeroorutigaa. Tamanna pissutigalugu aalisartut Royal Greenlandip saani Namminersorlutik Oqartussallu silataanni akerliussutsimik takutitsipput.
Aki aallarniutigineqartoq Royal Greenlandip nammineq aquppaa, isumaqatigiinniartussatulli pisussaaffeqanngillat.
Sapaatilli akunneri pingasut qaangiuttut aalisartut qassutitik atuliinnarpaat nipisannialerlutillu. Akiliutinneqartorlu 22 koruuni qaffanneqanngilaq.
Nipiaat suaannut akigititap kiilumut koruuninik pingasunik qaffanneqarnissaa, tassa kiilumut 25 koruuneqalernissaa Royal Greenland aalisartunut kingullermik neqerooruteqarpoq.

Tamannali ajornartorsiutitaqarsinnaasoq Københavns Universitetimi niuernermut inuussutissarsiornermullu inatsisinik ilisimatusarfimmi, Center for Markeds- og Erhversretimi ilisimatooq Karsten Naundrup Olesen naliliivoq:

- Uani pisumi piginnittut tassaapput pisortat allaffissornerinik ingerlataqartut. Oqartussat suliani tamani tamatigut aningaasaqarneq eqqarsaarsaatigalugu illersorsinnaasumik iliuuseqartassasut oqaatigineqartarpoq. Akip qaffanneqarnissaanut periarfissaqarsimanngippat, akilu qaffasissorujussuarmut inissinneqarniarpat aningaasaqarneq eqqarsaatigalugu akisussaassuseqanngitsumik iliornerulersinnaavoq, taanna oqarpoq.

Aamma atuarukKNAPK-p isumaqatigiissitsiniartoqarusuttoq akitigulli piumasaqaatit aalajangiusimaannarai

Taamaaliornerlu inatsisinik unioqqutitsinerusinnaassagunartoq Karsten Naundrup Olesen oqarpoq. Viborgimi 2014-mi suliaq assersuutaasinnaavoq, taamanimi kommunip pilersuinermik suliffeqarfik pigisani illoqarfimmi inuussutissarsiutigalugu isikkamik arsaattartunut qaffasippallaamik aningaasaleeqqusimavaa.

- Kommunip pilersuinermik suliffeqarfimmut qaffasippallaarujussuartumik aningaasaleeqqusisimanini aningaasaqarnikkut illersorneqarsinnaanngitsoq kommunip pisup kingorna paasivaa, Karsten Naundrup Olesen oqarpoq.

Naalakkersuisulli Royal Greenlandimut niuernermi akigititanut inatsisit atuuttut malillugit aalisartut nipisaat suaannik tunisineranni akimik qaffasinneroqqusigunik ajortussaanngitsoq taanna naqissusiivoq:

- Royal Greenland Namminersorlutik Oqartussanit pigineqarpoq, taamaattumillu isumaqatigiinniarnermut taamaattumut ikiuussinnaapput. Malittarisassat malinneqarpata inatsisit unioqqutinneqassanngillat, Københavns Universitetimi Center for Markeds – og Erhversretimi ilisimatooq Karsten Naundrup Olesen oqarpoq.

Naalakkersuisut suli isumaqatigiinniaqataqaajumanngitsut

Illuatungeriilli manna isumaqatigiissinnaanatik oqaluunneq ajormata qanittumi aaqqiissuteqartoqarnissaa nalunarallarpoq.

Isumaqatigiinniarnerit unittoormata KNAPK-p Naalakkersuisut isumaqatigiinniarnernut ilannguteqqullugit sapaatit-akunnerata siuliani piumasaqarput.

Naalakkersuisulli siulittaasuat Múte Bourup Egede (IA) aamma aalisarnermut naalakkersuisoq Karl Tobiassen (S) isumaqatigiinniarnernut ilanngunniaratik tusagassiuutinut sapaatit-akunnerata naanerani nalunaaruteqarput:

- Naalakkersuisuniit isumaqatiginninniarnernut akulerunnissamik pilersaaruteqanngilagut, Naalakkersuisut kattuffiit illersornissaat pingaartimmassuk aamma illuatungeriit namminneq aaqqiisinnaanissaat upperilluinnaratsigu, Karl Tobiassen oqarpoq.

Aamma atuarukKNAPK akerliussutsimik takutitsinialerpoq

Isumaqatigiinniarnermili maannamut periuuserineqartoq taamaginnarsinnaanngitsoq Naalakkersuisut nassuerutigaat, siunissamilu isumaqatigiinniartarnissat qanoq ingerlasarnissaat misissorneqarniarpoq. Aalisarnermut naalakkersuisoq tusagassiuutinut nalunaarummi oqarpoq:

- Nalunaarut pioreersoq misissussamaarparput imatut pisoqaqqinnginnissaa anguniarlugu. Aappassaammi taamatut pisoqarpoq taamaattumillu periuseq iluatsinngimmat nalunaarut qimerlooqqittariaqarparput. Piffissarli sivikeqimmat maannakkorpiaq tamanna pisinnaanngilaq, Aalisarnermut Piniarnermullu Naalakkersuisoq Karl Tobiassen oqarpoq. Suliap ingerlanneqarnera pingaartinneqassasoq taassuma neriorsuutigaa.

Nutaarsiassami kukkunermik nassaarsimaguit uunga allaffigineqarsinnaavugut.