KNAPK-p isumaqatigiissitsiniartoqarusuttoq akitigulli piumasaqaatit aalajangiusimaannarai
KNAPK-p Royal Greenlandillu nipisaat suaanik tunitsinermi akit suli isumaqatigiinngissutigaat, aalisartulli kattuffiata isumaqatigiissitsiniartartoq nakerisarsiunngitsoq isumaqatigiinniarnerit naammassinissaannut ikiuuttussaq tikilluaqquaa.
Naalakkersuisut partiinut isumaqatigiissitsiniartartumik atulersitsinissaannik kaammattuuteqarnerata kingunerisaanik taama tikilluaqqusipput.
Akilli ullumikkornit qaffasinnerunissaat KNAPK-p suli kaammattuutigaa.
- KNAPK-p tunisinermi akigitinneqartup qaffannissaa sulissutigissavaa, KNAPK-p pisortaa, Vittus Qujaukitsoq oqarpoq.
22 koruunit tassa Royal Greenlandip kalaallinut aalisartunut nipisaat suaannut kiilumut akigitinniagaa. Siorna aamma taama akeqarput. Aalisartullu siornatulli akimik ilorrisimaarutiginninnatik aalisarumanngillat. Taamaammat nipisaat apriilip aallaqqaataanili eqqissisimatinneqalerput, aalisartullu pisaqannginnertik pissutigalugu iluanaaruteqanngillat.
Akit naapertuilluanngitsut
KNAPK-p isumaqatigiinniarnerit naapertuutinngitsutut taanikuullugillu Royal Greenlandimut kisimi iluaqutissaqarnerarlugulu aalisartunik sumiginnaanerarnikuuai.
- Tunisassiornermi akigitinneqartoq nunat sanilitsinniittuunnaanngitsunut, niuerfimmi tamani akigitinneqartumut tulluussartariaqartoq isumaqarpugut, sineriammi aalisarneq ingerlanneqanngilaq tunisassiornermi akigitinneqartoq peqqutigalugu, Vittus Qujaukitsoq oqarpoq.
Kattuffiulli pisortaata tunisinermi qanoq akeqartariaqarnerannik kissaateqarnerlutik oqaatigiumanngilaa.
Piffissarlu aalisarfiusinnaasoq sivikilliartuinnaraluartoq aalisartut naammagittarlutik utaqqisariaqarput.
- Isumaqarpunga aalisartut sivisuumik utaqqinissaat pissusissamisuunngitsoq, taakkumi inuussutissarsiutaat pineqarmat, suliaq sivitsortuussappat, piffissaliussaq aamma pingaaruteqartoq ilisimaarivarput, Vittus Qujaukitsoq oqarpoq.
Paamiuni aalisartut minillugit, taakkumi KNAPK akerleralugu namminneq aalisarnissaminnut piareerlutik nalunaarput – aamma naak isumaqatigiissuteqartoqanngikkaluarpat. Tamannalu KNAPK-p pakatsissutigaa. Tamannami isumaqatigiinniarnerannut innarliivoq.
Isumaqatigiinniarusuttut
Isumaqatigiinniarnermi illuatungaani Royal Greenland isumaqatigiissuteqarusuppoq. Tamannali Royal Greenlandimut kisimi atuunnani aalisarnermut tamarmut atuutissaaq.
- Royal Greenland kisimiilluni akit pillugit isumaqatigiissusiorfigineqarpat ingerlatseqatigiiffik unammillertinut sanilliullugu ajornerusumik inissisimalissaaq, unammillertimmi niuerfinni pissutsit naapertorlugit akit qaffallugillu apparsinnaavaat. Royal Greenland taamaaliorsinnaanavianngilaq. Taamatut inissisimanissarput kissaatiginngilarput, Royal Greenland tusagassiuutinut nalunaarummi allappoq.
Suliffeqarfissuup akiliutinneqartoq 22 koruuni kiilumullu koruunimik bonusitaqartoq niunermi atugassarititaasut atuuttut aallaavigalugit naatsorsugaasoq nassuiaatigaa.
Taakkuli isumaqatigiissitsiniartartumik nakerisarsiunngitsumik kissaateqartoqarnera ammaffiginerlugu uppernarsarnianngilaat. Tamanna namminneq KNAPK-llu akornanni suliaasoq suliffeqarfissuup attaveqaqatigiinnermut pisortaata erseqqissaatigaa.
Isumaqatigiissitsiniartartoqarnersoq isumaqatigiissitsiniartartoqannginnersorluunniit apeqqutaanani KNAPK-p piumasaqaataa taamaaginnarpoq. Tunisinermi akiutinneqartoq qaffanneqassarnissaa kisimi aqqutissaavoq.
Isumaqatigiissitsiniartartoq ullumikkut akigitinneqartup assinganik naliliippat akuerisinnaavisiuk?
- Naamik. Isumaqarpunga KNAPK-p akimik qaffaanissaa illuatungeriinnut ersarissuusoq, Vittus Qujaukitsoq oqarpoq.