Peqatigiiffiup KNAPK akerlileraa: Aalisartut nipisannik utaqqigaluaannarnissartik ernumassutigaat

22 koruunit kiilumullu bonusimut 1 koruuni.

Royal Greenlandip nipisanniartunut tunisinermut taanna akigitinniarpaa. Akiliussarli taanna KNAPK-p siulersuisuunerisa akueriumanngilaat. Akikippallaartoq, siulersuisuunerit isumaqarput.

Taamaammat nipisanniarneq apriilip aallaqqaataani aallartereertussaagaluartoq nipisanniartoqanngilaq.

Maannali Paamiunit akerliusumik nalunaaruteqartoqariataarpoq. Paamiuni peqatigiiffik naak KNAPK-p siulersuisuunerisa kiilumut akiliussaq 22 koruunimik annerutinniaraluaraa nipisanniarnissamut piareersimalluni ullumi nalunaaruteqarpoq.

Aalisarnermut piniarnermullu naalakkersuisoqarfiup Paamiuni nipisanniarneq apriilip qulingani ammassasoq ullumi paasissutissiissutigaa.

Apriilip qulingani nipisannialissasut

Paamiunimi aalisartut iluaqutaanngitsumik utaqqigaluaannarnissartik ernumassutigaat. Taamaammat siulersuisuunitik akerleralugit nipisanniarneq aallartinniarlugu naalakkersuisoqarfimmut nalunaarutigaa.

- Siorna nipisanniartoqannginnera misilittagaqarfigaarput. KNAPK-p Royal Greenlandimut akilissaarnerutitsisoqarnissaa piumasaraa, Namminersorlutik Oqartussallu saanni akerliussutsimik takutitsineq aaqqissuullugu. Susoqanngilarli, aalisartullu aningaasanik annaasaqaannarput, KNAPK-p Paamiuni immikkoortortaqarfiani siulittaasoq, Niels Lorentzen KNR-imut oqarpoq.

- Maanna maani aalisartut allanik periarfissaqanngitsut aalisarusupput, utaqqigaluaannarusunngillallu. Taamaammat aalisarneq aallartinniarpaat.

Taamaammat nipisannut kiilumut 22 koruuninik annerusumik pissarserusukkaluarlutik nipisanniarneq apriilip qulingani aallartissaaq.

- Akikippallaartoq uagut aamma isumaqarpugut, Niels Lorentzen oqarpoq.

Akerliussutsimik takutitsinermik siorna inerneqartoq

Tunisinermi akiliussat Royal Greenlandip aalisartullu kattuffiata KNAPK-p akornanni isumaqatigiinngissutaanerat pissutigalugu nipisanniarnerup aallartinnissaa siorna kinguartinneqarpoq.

Tamanna aalisartut allagartarsualisarlutik Namminersorlutik Oqartussat saannut Nuummilu Royal Greenlandimut akerliussutsimik takutitsinerannik kinguneqarpoq.

Royal Greenlandimmi tunisinermi kiilumut 22 koruunimik akiliuteqarniarnera isumaqatiginngilaa. Taamaattoqarporli. Aatsaat apriilimi sapaatit akunneri pingasut qaangiutilereersut qassutit ninginneqarput, aalisartullu kiilumut tunisaminnut 22 koruunimik bonusimillu 1 koruunimik pissarsiaqarput.

Aalisartut utaqqisinnaajunnaartut kimigiisernerata kingunerisaanik KNAPK-p akiliussaq naggataatigut akueriinnarpaa.

Nipisanniarneq siusinnerpaamik apriilip aallaqqaataani aallartinneqartarpoq, sivisunerpaamillu ullunik 60-inik imaluunniit pisassiissutit nungunnissaata tungaanut sivisussuseqarsinnaalluni.

Tassa imaappoq nipisanniarneq juulip 15-ini kingusinnerpaamik unissaaq.