Akit aaqqiagiinngissutaasut: Nipisanniarneq ukioq manna kinguaattooqqittoq
Ullut 60-it.
Nipisanniarsinnaaneq – apriilip aallaqqaataanit aallartissinnaagaluarpat annerpaamik taama sivisussuseqarsinnaavoq.
Ukioq mannali ullut taama amerlatigisut nipisanniartoqassanngilaq. Nipisanniartoqarsinnaalereeraluartormi qassutit suli ninginneqanngillat. Nipisanniarfiusinnaasorlu maanna sivikilligaluttuinnarpoq.
- Aalisarnermut Piniarnermullu Naalakkersuisoqarfik ukioq manna nipisanniarnerup apriilip aallaqqaataani aallartinnissaanut tunngasumik ilisimatitsissummik suli tigusaqanngilaq. Taamaammat nipisanniarneq ukioq manna apriilip aallaqqaataani aallartinneqassanngilaq, tunisisoqarsinnaananilu pisisoqarsinnaanngilaq. Taakku aatsaat pisinnaalissapput Naalakkersuisoqarfik nalunaaruteqareerpat. Tamanna aamma sunngiffimmi aalisartunut atuuppoq. Naalakkesuisoqarfik tallimanngormat allappoq.
Aningaasat pissutaasut
Aaqqiagiinngissuteqartoqarneranullu akit pissutaapput.
- KNAPK aamma Royal Greenland akiusussaq pillugu isumaqatigiissimanngimmata, aalisarneq suli aallartinngilaq, Aalisarnermut piniarnermullu naalakkersuisoqarfiup pisortaa, Jørgen Isak Olsen, KNR-imut oqarpoq.
Taamaalilluni siorna aaqqiagiinngissutaasoq aallarteqqippoq. Aaqqiagiinnginneq aalisartut allagartalersualisarlutik Namminersorlutik Oqartussat allaffeqarfiannut Nuummilu Royal Greenlandimut akerliussutsimik takutitsinerannik ukioq ataatsip matumani siorna kinguneqarpoq.
Royal Greenlandimmi tunisinermi kiilumut 22 koruunimik akiliuteqarniarnera isumaqatiginngilaa. Taamaattoqarporli. Aatsaat apriilimi sapaatit akunneri pingasut qaangiutilereersut qassutit ninginneqarput, aalisartullu kiilumut tunisaminnut 22 koruunimik bonusimillu 1 koruunimik pissarsiaqarput.
Royal Greenlandillu akip assinga ukioq manna atorniarsareqqippaa. Attaqaqatigiinnermut pisortaq, Masaana Egede KNR-imut nalunaarpoq.
Assigiinngissuteqarporli: Royal Greenlandip ukioq manna 900 tonsit tunineqarnissaat kissaatigaa, taakku siornamit 100 tonsimik amerlanerupput.
Akit naapertuilluartut
Aalisartulli kiilumut 22 koruunit ukioq manna akuerisinnaanngikkaat, KNAPK tusagassiuutinut nalunaarummi allappoq. Siulittaasorlu Nikkulaat Jermiassen kamangaarami nunatsinni politikerit ilannguteqquai.
- Inatsisartut taamaattumik akuleruttariaqalerput, aammalu Naalakkersuisut Royal Greenland A/S-ilu inissillugit, taamaasilluta aalisartunut inuiaqatigiinnullu iluaqutaasumik tunisinermi akinik naapertuilluarnerusunik eqqussilluta, piginneqatigiiffimmut kisimi iluaqutaanngitsunik. Aalisartut taakkuupput piginneqatigiiffiup isertitaanut annertuumik tulaassuisut, taanna oqarpoq.
Aaqqiagiinngitsoqaraluarpalluunniit: Nipisaat suaannik nutaanik Kalaaliaqqamit pisinissannut qilanaaruit naammagittartariaqarputit. Nipisanniarnerummi qaqugu aallartinnissaa oqaatigissallugu ajornakusoortoq, naalakkersuisoqarfiup pisortaa, Jørgen Isak Olsen oqarpoq:
- Sumiiffinni nipisalerisussat piareerlutik nalunaarneranniit sapaatit akunnerat qaangiuppat aalisalersinnaapput, taanna oqarpoq.
Sivisunerpaaamik ulluni 60-ini pisassalluunniit nungunnisaannut nipisanniartoqarsinnaavoq.
Tassalu nipisanniarneq kingusinnerpaamik juulip 15-ani unissaaq.