Nipisaat suaannik aalisartut akerliusut: Akit qaffanngippata aalisarnianngilanga
- Akit taamaaginnassappata uanga naatsorsuutiginngilara arnarlunniassallunga, Vilhelm Egede oqarpoq.
-Pisassat annikillutillu erngiinnaarannguaq nungunneqassapput. 40 koruunit anguneqarnissaat kissaatiginaraluaqaaq, uagutsinnut iluaqutaanerujussuussagaluarpoq.
Steffanus Boye aamma akerliuvoq, taanna ungasissumiit akerliussutsimik takutitsiartoqataavoq.
- Qeqertarsuatsiaarmiuuvunga maani peqatigiiffik KNAPK-lu aaqqissuussilermata maanngarpunga peqataarusullunga. Tassa inuunerma annersaani aalisartuunikuulluni akit naammaginarunnaaraluttuinnarnerat pissutigalugit maanngarpunga, Steffanus Boye oqarpoq.
Akinut naammaginninngitsut
Aalisartut taakku marluk Royal Greenlandip nipisannut akigititaat naammaginngilaat. Tassami apriilip aallaqqaataaniit nipisannik tunisineq aallartittussaagaluarpoq.
Assi: Malik Brøns/KNR
Kalaallit Nunaanni Aalisartut Piniartullu Kattuffiat, KNAPK Royal Greenlandilu kiilumut akigitinniakkamut isumaqatigiissinnaanngillat.
Royal Greenlandip kiilumut 22 koruuninik akeqartitsiniarpoq - akigititarli annikippallaartoq, aalisartut isumaqarput.
AAMMA ATUARUK Aalisartut Royal Greenlandimut akerliussutsimik takutitsisut: Nipisaat akikippallaarput
- Ajornanngitsuuppat Royal Greenlandip qaffasinnerpaaffissaanut pisissinnaasuuppagu nuannissagaluarpoq. Ajornanngippat 40 koruunit angusinnaasuuguniuk , siornatigut 40 koruunit sinneqarnikuuvoq. Eqqaamavara Disko Bugtimut 2000-imi arnarlunniarnikuuvunga taamanikkut 40 koruunit sinneqarpoq, Steffanus Boye oqarpoq.
- Taamaappunga minnerpaamik 30 koruunit anguneqarsinnaanissaat kissaatigaara, Steffen Boye oqarpoq.
Taanna Jokum Jessenimit taperserneqarpoq. Royal Greenland aalisartut eqqarsaatigalugit itertariaqartoq taanna isumaqarpoq.
- Nunatta aalisarneq isumalluutigaa, aamma nunami suliffilippassuit aalisakkanik isumalluuteqarput. taamaammat Royal Greenland itertariaqarpoq, aalisartut eqqarsaatigalugit, aammami nunami suliffillit.
Isumaqatiginninniaqqilersut
KNAPK-p Royal Greenlandillu akornanni isumaqatigiinniarnerit marsip ulluisa 24-annili unittoorput. Royal Greenlandip kiilumut akigitinneqartoq 22 koruuniusoq attatiinnarniarpaa, tamannali akikippallaartoq KNAPK isumaqarpoq.
KNR-p paasissutissaatai naapertorlugit taakku siorna kiilumut 21 koruunip 24 koruunillu missaaniippoq.
Assi: Malik Brøns/KNR
Maannali naaperiaaniartoqarsinnaalerunarpoq. Taakkummi isumaqatiginninniarlutik maanna aallarteqqipput. Royal Greenlandimi sulisoqarnermi attaveqatigiinnermilu pisortaq, Jens K. Lyberth taama oqarpoq.
- Ippassaq unnukkut isumaqatigiissutigaarput isumaqatiginninniarnerit ingerlaqqissasut, ullaaq aamma tamanna allakkatigut nalunaarutigaarput.
Royal Greenlandimi tusagassiuutitigut isumaqatiginninniarnianngilaq, kisianni:
- Aalisarnerup qanittumi aallartissinnaanissaa neriuutigaarput, uagut piareersimavugut, Jens K. Lyberth oqarpoq.
AAMMA ATUARUK Aki pillugu isumaqatigiinnginneq: Nipisanniarneq suli aallartinngilaq
Aalisartut kiilumut akigitilerusutaat pillugu Royal Greenland 22 koruuniniit qaffasinerussanersoq paasissutisseerusunngilaq.
Royal Greenlandilumi mianersorfissaqartoq, Royal Greenlandimi attaveqatatigiinnermut pisortaq Masaana Egede oqarpoq.
- Imaakkamik akiit qaffasippallaarpata uagut pisiortortunut tunisinnaajunnaassagatsigut, taamaalillunilu uninngasuutigut amerliartuinnassallutik. Taamaattoqarpallu aappaagumut akornusiisussaagamik, KNR-imut taanna oqarpoq.
Saamimmiit: Vittus Qujaukitsoq, KNAPK-mi pisortaaneq. Nikkulaat Jeremiassen, KNAPK-mi siuilttaasoq kiisalu Aslak Jensen, siulittaasup tullia. Assi: Malik Brøns/KNR
