Aalisartut Royal Greenlandimut akerliussutsimik takutitsisut: Nipisaat akikippallaarput
Naqqiut: Allaaserisatsinni siullermi allakkaluarparput Royal Greenland apersorneqarusunngitsoq. Tamanna ilumuunngilaq, Royal Greenland apersorneqareernikuuvoq, una atuarsinnaavat.
Aalisartut naammagisimaarinninngillat. Naammagisimaannginnerallu ima annertutigaaq allaat Royal Greenlandimut ullumi akerliussutimik takutitsillutik.
Tamanna ukioq manna nipisaat tunisaanerisa apriilip ulluisa aallaqqaataanni aallartittussaagaluarluni suli aalisarneqalinnginnerannik pissuteqarpoq.
Tamannalu aalisartut piniartullu kattuffiata aalisakkanillu tunisassiorfiup Royal Greenlandip akornanni kiilumut akinik isumaqatigiissinnaanngitsoqarneranik pissuteqarpoq.
KNAPK Sisimiuni, Nuummi Narsamilu Royal Greenlandimut akerliussutsimik ullumi qulinut takutitsinissamik aaqqissuussivoq.
Isumaqatigiinniarnerit unittooqqasut
KNAPK-p Royal Greenlandillu akornanni isumaqatigiinniarnerit marsip ulluisa 24-annili unittoorput. Royal Greenalandip kiilumut akigitinneqartoq 22 koruuniusoq attatiinnarniarpaa, tamannali akikippallaartoq KNAPK isumaqarpoq.
KNR-p paasissutissaatai naapertorlugit taakku siorna kiilumut 21 koruunip 24 koruunillu missaaniippoq.
AAMMA ATUARUK Fiskere i Narsaq: Det er ubehageligt, at vi ikke kan indhandle stenbiderrogn endnu
- Suaat nunanut allanut tunineqarsinnanngorlugit suliarineeqarnissaat imminut akilersinnasariaqarpoq. Akisuallaarpata tunisinnaanngilavut – taavalu nipisat suaannik annertuallaartunik uninngasuuteqalissaagut, Royal Greenlandip attaveqaqatigiinnermut pisortaa, Masaana Egede KNR-imut sapaatip akunnerata siuliani oqarpoq.
Narsami Royal Greenaldnip tunitsiviani pisortap, Niels Sakariassenip isumaqatigiinniarnerit allarteqqissimanerarpai – tamannali akerliussutsimik takutitsisunut mailikkuinnaq oqaatigaa.
Namminersorlutik Oqartussat nipisaat suaannik aalisarnermut nalunaarutaat naapertorlugu tunitsiviit aalisartullu kattufiata tunisineq qaqugu aallartissanersoq isumaqatigiissutigisussaavaat. Ukioq manna tunisisinnaaneq apriilip aallaqqaataani aallartittussaagaluarpoq.
