Narsami aalisartut: Suannik tunisisinnaannginnerput tujorminarpoq

Narsami inuussutissarsiutigalugu aalisartut nipisat suaannik tulaassuisinnaalernissaminnut utaqqikatapput. KNAPK-lli Royal Greenlandimut tulaassuinermi aki piumasaa anguneqanngippat qassutitik nakkartikkusunngilaat.
- Tujorminartorujussuartut isumaqarfigivarput. Apriilip aallaqqaataanit suanniarnissaq siunniunnikuugaluaratsigu, Ole Jørgen Davidsen oqarpoq. Assi © : KNR / Malik Brøns
Allattoq Andreas Wille
apriilip 07-at 2022 16:24

Nipisanik arnalunnik aalisarneq malittarisassat malillugit apriilip aallaqqaataani aallartissinnaavoq. Qaqugukkut aalisalertoqassanersoq aalisartut kattuffiisa tunitsiviillu isumaqatigiissutigisussaavaat.

Kisianni aalisartut sinniisaat KNAPK-meersut nipisaallu suaannik pisilluartartoq, Royal Greenland, akit pillugit suli isumaqatigiinngillat. Tamaammallu nipisat suaat suli tunisaanngillat.

AAMMA ATUARUK Aki pillugu isumaqatigiinnginneq: Nipisanniarneq suli aallartinngilaq

Tamanna Narsami inuussutissarsiutigalugu aalisartut nipisannik tulaassuineq ajornerannik kinguneqarpoq.

- Tujorminartorujussuartut isumaqarfigivarput. Apriilip aallaqqaataanit suanniarnissaq siunniunnikuugaluaratsigu, KNAPK-p Narsami immikkoortortaqarfiani siulittaasoq, Ole Jørgen Davidsen KNR-mut taama oqarpoq.

Kilomut koruunit 22-it

Royal Greenlandip nuna tamakkerlugu tunisassiorfimmini tamani aalisartoq nipisat suaannik tunisisoq kilomut 22 koruunimik akilerusuppaa. Tamannali KNAPK-p amigaraa, taamaalilluni aalisarneq suli aallartinngilaq. Narsarmiut kattuffitsik akigissaarnerusumik isumaqatigiissuteqassasoq neriuutigalugu maanna aalisarusunngillat.

- Aallarteqquppatigut aallartissuugut, kisianni aallarteqquneqanngikkutta aallartissanngilagut, Ole Jørgen Davidsen oqarpoq.

Narsarmiut aki kisiat amigarinngilaat. Royal Greenlandip Narsami tunisassiorfianut nipisat suaat 22 tonsi tunineqarsinnaasoq tunisassiorfik nalunaareernikuuvoq. Tamannalu Narsarmi aalisartunut aningaasarsiutaangaarsinnaanngitsoq, Ole Jørgen Davidsen naliliivoq.

Aningaasarsiorfiit pingaarnersaat

Taassuma Narsami nipisat suaannik tunisisartut, peqatigiiffimmut ilaasortat, 30-it missaaniinnerarpai. Aki oqimaassuserlu taamaatsillugit aalisartoq ataaseq agguaqatigiisillugu 16000 koruuninik isertitaqassaaq.

- Suaat aningaarsarsiorfiit pingaarnersaattut taasaraluarlugit kisianni pisassat taamak ikitsigitillugit kajumigineqanngillat aalisarneqarnissaat. Taavalu aki taamak mikitigitillugu, Ole Jørgen Davidsen oqarpoq.

Royal Greenlandip attaveqaqatigiinermut pisortaata, Masaana Egedep, KNR-imut paasissutissiinera naapertorlugu Narsami aalisartut ukiut siuliini aamma 22 tosinik tunisisarput.

Taammaammat piginneqatigiiffissuup tamaani aalisartut ukioq manna aamma taama tunisaqassasut aalajangiusimavaa.

Aamma atuaruk