USA Libanonimut 1 milliardit koruunit sinnerlugit ikiorsiissuteqartoq
USA Libanonimi innuttaasunut, sakkuaattoqarnerani eqqorneqarsimasunut, 157 millionit dollarit nalinginut, tassa 1 milliardit koruunit sinnerlugit nalinginut ikiorsiiniarpoq.
USA-p nuanut allanut tunngasunut ministereqarfia tallimanngornermi unnukkut taama ilisimatitsivoq.
Aningaasat Libanonimi inunnut qimaatitaasimasunut ikiorsiissutaassapput. Libanonimiut nunamut sanilerisamut Syriamut qimaasut aamma ikiorserneqarniarput.
- Libanonimi ikiorsiiniarnermi ilungersuuteqartoqaleruttornerata nalaani ikiorsiiniartoqarpoq, inuimmi 1 millioninit amerlanerusut angerlarsimaffitsik qimattariaqarsimavaat, nalunaarummi ilaatigut allassimavoq.
Tuusintilikkuutaat toqutaasimasut
Islamisiortut Hamasimeersut Israelimik siorna oktobarip ulluisa arfineq-aappaanni saassussereersullu Kangia Qiterlermi aaqqiagiinngissuteqartoqalerpoq.
Hamas Gazamit Israelimut iserluni inunnik 1200-nik taamanikkut toqutsivoq, inuillu 250-it sallunaveeqqutitut taamani tigullugit.
Libanonimi islamisiortut Hizbollahmeersut Israel raketinik aqaguani saassutilerpai. Hamas tapersersorniarlugu taamaaliorlutik Hizbollahp taamanikkut nalunaarutigaa.
Hizbollahp raketinik igeriussisarnera pissutaalluni Israelip avannarpasissortaani innuttaasut 60.000-t missaat angerlarsimaffitsik qimattariaqarsimavaat.
Hizbollahp atortui sumiissusersiutit tuusintilikkaat septembarip ulluisa 17-ianni qaartinneqarmatali Kangia Qiterlermi sakkuaannerit sakkortuseriaannarsimapput. Inuit tuusintilikkaat qaartitsinerni taakkunani aqqunartiterput.
Israel Hizbollahp aqutsisuini, peqqumaasiviinik, isertortumillu paasiniaasartuinik kingorna saassussilerpoq.
Libanonimi inuit 2000-ngajaat ukiup kingulliup ingerlanerani toqutaasimapput. Libanonip peqqissutsimut ministeria taama ilisimatitsisoq nutaarsiassaqartitsiviup Reutersip allaaseraa.
/ritzau/