Katuaq Pan Arctic Visioneqarnissaanut piareersartoq – sapaatip akunneraannanngorpoq
Sapaatip akunnera qaangiuppat aallartissaaq. Nunarput Pan-Arctic Visionimi aaqqissuisuuvoq, tamannalu kulturikkut illorsuarmi aaqqissuunneqassalluni.
Naja P. nunarput sinnerlugu peqataassaaq, taanna Alaskami, Nunavummi, Islandimi, Savalimmiuni, Norgep avannaani, Sverigep avannaani, Finlandip avannaani Ruslandillu issittortaanit nipilersortartullu appissapput.
- Nipilersoriaatsit assigiinngitsorpassuussapput – nipilersuutinit sakkortuunit eqqissisimasunut – aamma taakku akornanni rappertartoqassasoq, Katuami aaqqissuussinernut pisortaq, Jakob Søvndahl Skovaa oqarpoq.
Peqataasussat sapaatip akunnerata ingerlanerani nunatsinnut tikeralissapput.
- Nipilersortartut qulit tulleriiaallutik appittaarnissaat pissanganarpoq. Teknikkilerisutta toqqaannartumik aallakaatitsinitsinni isumagissavaat, aaqqissuussinermut pisortaq oqarpoq.
Nunatsinni periarfissaq immikkut ittoq
Eqqumiitsuliortoq Lisbeth Karline tusarnaartitsiffissami pinnersaasuuvoq, taamaammat maanna amigaateqanngilaq.
- Teknikkikkut atortut inissitsernissaat amigaatigiinnarpagut.
Tusarnaartitsineq KNR TV-kkut toqqannartumik aallakaatinneqarlunilu internettikkut aallakaatinneqassaaq. Tamannalu nunatsinnut immikkut ittumik periarfissamik pilersitsisoq, Jakob Søvndahl Skovaa isumaqarpoq.
- Nunatta pitsaasumik ersersinnissaanut nunattalu takutinnissaanut periarfissaavoq, taanna oqarpoq.
Issittumi Pan-Arctic Visioneqarnera Eurovisionimut assinguvoq, taannali Europamiut erinarsornermik unamminerannut attuumassuteqanngilaq.
- Issittumi nunat ataatsimoorlutik, nuannisaqatigiillutik nipilersorlutillu unammineratut isigineqarsinnaavoq. Kisianni aamma issittumi nipilersornikkut piginnaasalinnik takutitsinermi suleqatigiinneruvoq, aaqqissuussinermut pisortaq oqarpoq.
Ajugaanissamit ataatsimoorneq pingaarnerusoq
Aaqqissuussineq siullerpaamik Norgemi Vadsømi siorna aaqqissuunneqarpoq, nipilersortartullu NUIJA issittormiorpalaarnerpaatut ajugaallutik. Nunarput ukioq manna aaqqissuussinissamut aamma ajugaavoq, taamaammat Pan-Arctic Visionip aappassaanik aaqqissuunneqarnissaa nunatsinnit aaqqissuunneqarpoq.
Issittup inuit nunap inoqqaajusut inoqqaajunngitsullu – ersinarsoqatigiinnermi issittumilu ataatsimoornermi pilersitsinissamut ataatsimoortinnissaat anguniagaavoq.
- Ajugaasumik toqqaanissaq siunertaavallaarani Issittumi ataatsimoornermik pilersitsinissaq pingaarneruvoq, Amund Sjølie Sveen KNR-imut siorna oqarpoq.
